پرەمەر-مينيستردىڭ ورىنباسارى داريعا نازاربايەۆا اقمولا وبلىسىنىڭ ورتالىعى كوكشەتاۋ قالاسىنا بارعان ساپارىندا جەرگىلىكتى شەنەۋنىكتەردەن وڭباي الدانعان سياقتى، - دەپ حابارلايدى «قامشى» پورتالى.
«ۆيسە-پرەمەردى الداۋ» وپەراسياسىنىڭ جاي-جاپسارىن «فەيسبۋك» الەۋمەتتىك جەلىسىندە جەرگىلىكتى مالىك عابدۋللين مۋزەيىنىڭ عىلىمي قىزمەتكەرى ويۋلى قۋانىش ەرعالي ۇلى جايىپ سالعان.
«...قوش، سونىمەن داريعا نازاربايەۆا كوكشەتاۋعا كەلەدى دەگەن حابار تاراعان سوڭ ءبىزدىڭ اقمولا وبلىسىندا الا شاپقىن باستالدى دەيسىڭ ءبىر. ەلدىڭ ءبارى اناۋ ءۇش تىلگە قاتىستى رەفورما قابىلدانباسا ەكەن دەپ ۋايىمداپ جۇرسە، ءبىزدىڭ باسشىلار سوعان اتسالىسپاق نيەتتە ەكەن. ءتىپتى قاتتى تىرىسقانى سونشالىق داريعا حانىمنىڭ ءوزىن الداپ جىبەرگەن عوي. داريعا ءنومىرى №2 مەكتەپكە بارماق بولعان ەكەن، ءبىزدىڭ سۇڭعىلا باسشىلار ەكىنشى مەكتەپتىڭ وقۋشىلارىنىڭ ورنىنا №3 مەكتەپتىڭ وقۋشىلارىن وتىرعىزىپ قويىپتى. وتىرعىزىپ قويىپ «بيولوگيا» ءپانىن اعىلشىن تىلىندە وتكىزىپتى.
ءاي، سابازدارىم-اي! نە دەگەن اقىل، نە دەگەن مي؟! وسى جاعدايعا بايلانىستى اتا-انالار مەن ۇستازداردىڭ، وقۋشىلاردىڭ اراسىندا رەنىش بار. كىم ءوزىن، بولماسا ءوزىنىڭ بالاسىن بىرەۋدەن كەم كورەدى؟ ارينە، رەنىشتەرى ورىندى»، - دەپ جازادى عىلىمي قىزمەتكەر.
كوكشەتاۋلىق ءبىلىم بەرۋ سالاسى شەنەۋنىكتەرىنىڭ بىلىعىن اشقان قۋانىش ەرعالي ۇلى مۇنداي ارەكەتتەردىڭ ەڭ الدىمەن ۇرپاق تاربيەسىنە كەرى اسەر ەتەتىنىن ايتىپ وتىر.
«ال، ەندى باستى ماسەلە – ءبىز كىمدى الداپ ءجۇرمىز؟! جاس ۇرپاقتى وتىرىكپەن اۋىزداندىرىپ ءجۇرىپ، قالاي بەتىمىز بۇلك ەتپەي تاربيە تۋرالى ءسوز ايتامىز؟! سوندا داريعا نازاربايەۆانى قارسى الۋعا وبلىستىڭ ىعاي-سىعايلارى بارعان، كىم ەكەنىن اتتارىن اتاپ، تۇرلەرىن تۇستەمەي-اق قويايىن، سولاردىڭ بىرەۋى وسى ماسەلە تۋرالى جاق اشپاعانىنا ناليمىن. ەل بولامىز دەيمىز، قايدان ەل بولامىز مىنا تۇرىمىزبەن جاس بالانىڭ كوزىن باقىرايتىپ قويىپ كوزىنشە "ويناس جاساپ" جاتساق. ۇيات ەمەس پە؟! كۇلەمىز بە، جىلايمىز با؟!
وسى جازبام ءۇشىن جەرگىلىكتى بيلىك مەنىڭ دە ماڭدايىمنان سيپاماسىن بىلەم! ءبىراق ۇندەمەي قالۋعا ازاماتتىق ار-ۇجدانىم جىبەرمەدى. ءۇن قوسىڭىزدار اعايىن! انا ءتىلى ولارعا كەرەك بولماسا بىزگە كەرەك! مەن بالامنىڭ ماڭگۇرت بولعانىن قالامايمىن!»، - دەپ قورىتادى ويىن قۋانىش ەرعالي ۇلى.
