حەلسينكيدەگى پەرزەنتحانانىڭ ءتورت اكۋشەرى تۇنگى كەزەكشىلىك كەزىندە ازوتتىڭ شالا توتىعىن قولدانىپ، ودان كەيىن ايەلدەردى بوساندىرۋعا كومەكتەسكەن، - دەپ جازادى قازاقپارات YLE تەلەراديوكومپانياسىنا سىلتەمە جاساپ.

فينليانديا استاناسىنداعى Kätilöopisto اۋدانىنداعى پەرزەنتحانادا تۇراقتى كەلىسىمشارت بويىنشا جۇمىس ىستەيتىن ەكى اكۋشەر ايەل قىزمەتتەن شىعارىلدى. بۇعان دەيىن اۋرۋحانادا تاعى دا ەكى اكۋشەردىڭ ۋاقىتشا ەڭبەك كەلىسىمشارتى ۇزارتىلمايتىنى حابارلاندى.

دۇيسەنبى كۇنى Kätilöopisto اۋرۋحاناسى ءتورت اكۋشەر ايەلدىڭ كەزەكشىلىك كەزىندە «كوڭىل كوتەرەتىن گازدى» قولدانىپ، ودان كەيىن جۇكتىلەردى بالا بوساندىرعانى تۋرالى حابارلاعان بولاتىن.

«اۋرۋحانا بۇل وتە كۇردەلى جاعداي دەپ ساناپ، باسقا امالىمىز بولمادى. ءبىز وسىلاي بولعانىنا وكىنىش بىلدىرەمىز»، - دەپ مالىمدەدى اۋرۋحانانىڭ باس دارىگەرى ميكا نۋۋتيلا.

اكۋشەر ايەلدەرگە قاتىستى قانداي دا ءبىر باسقا جازا قولدانىلمايدى. دارىگەردىڭ ايتۋىنشا، مۇنداي وقيعالار بۇرىن ورىن الماعان. ول گاز يىسكەگەن اكۋشەرلەردىڭ پاسيەنتتەر قابىلداۋى ولاردىڭ ومىرىنە ءقاۋىپ توندىرگەنىن  اتاپ ءوتتى.

«ابىروي بولعاندا، ەشتەڭە بولعان جوق. انالار دا، بالالارى دا ءدىن امان»، -دەدى ول.