2011 جىلدان بەرى «جۇمىسپەن قامتۋ 2020 جول كارتاسى» باعدارلاماسىن جۇزەگە اسىرۋ بارىسىندا ەكونوميكالىق الەۋەتى تومەن ەلدى مەكەندەردەن 17 مىڭنان استام ازامات كوشىرىلدى (5 مىڭعا جۋىق وتباسى)، - دەپ حابارلايدى «قامشى» پورتالى ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسپا ءسوز قىزمەتى بەرگەن اقپاراتقا سىلتەمە جاساپ.

جاڭا مەكەن-جايعا كوشىپ كەلگەن ازاماتتاردىڭ ىشىندە 8،4 مىڭ ادام ەڭبەككە جارامدى جاستا، ولاردىڭ 6،5 مىڭ نەمەسە جالپى كورسەتكىشتىڭ 77،3%-ى جۇمىسپەن قامتىلعان كورىنەدى.

كوشىرىلگەن بارلىق وتباسىلارى مەملەكەت ەسەبىنەن تەگىن باسپانا الدى، 30%-عا جۋىق وتباسى جەكە تۇرعىن ۇيلەردە تۇرسا، 70%-ى پاتەرلەر نەمەسە جاتاقحانادان بولمەلەر الدى. جالپى العاندا 1223 جەكە تۇرعىن ءۇي، 108 كوپپاتەرلى تۇرعىن ءۇي جانە 12 جاتاقحانا سالىندى.

وبلىستار اراسىندا كوشىرىلگەن ادامداردىڭ باسىم بولىگى قاراعاندى وبلىسىندا – 4 428 ادام، پاۆلودار جانە شىعىس قازاقستان وبلىستارىندا سايكەسىنشە 3 145 جانە 2 529 ادام بولدى.

ەستەرىڭىزگە سالا كەتەيىك، «جقجك 2020» باعدارلاماسىنىڭ ءۇشىنشى باعىتى جۇمىس بەرۋشىنىڭ قاجەتتىلىگى شەڭبەرىندە وقىتۋ جانە قونىس اۋدارۋ ارقىلى جۇمىسقا ورنالاسۋعا جاردەمدەسۋ بولىپ تابىلادى. سونىمەن، 2015 جىلى ەكونوميكالىق الەۋەتى تومەن ەلدى مەكەندەردەن 1200-دەن استام ادام كوشىرىلدى.