قىتايدان ورالعان قانداسىمىز اقمولا وبلىسىندا اۋداندىق ءماسليحاتقا دەپۋتات بولىپ سايلاندى، - دەپ حابارلايدى «قامشى» پورتالى.

20 ناۋرىزداعى سايلاۋدا قانداسىمىز ەرعالي اسقار ۇلى 56 پايىز داۋىس جيناپ اقمولا وبلىسى ەرەيمەنتاۋ اۋدانى ءماسليحاتىنىڭ دەپۋتاتى اتانعان ەدى. ارعى بەتتەگى اعايىنعا ۇلگى بولسىن دەگەن نيەتپەن وسى جاڭالىقتى سۇيىنشىلەپ جاريالاپ وتىرمىز.

ەرعالي 1989 جىلى 1 قاراشادا جۇڭگو حالىق رەسپۋبليكاسى التاي ايماعى شىڭگىل اۋدانىندا دۇنيەگە كەلگەن. سول جەردەگى باستاۋىش جانە نەگىزگى مەكتەپتى ءتامامداعان. 2005 جىلى وتباسىمەن بىرگە قازاقستانعا كوشىپ كەلگەن.  2005-2007 جىلدارى ەرەيمەنتاۋ اۋدانى  ولجاباي باتىر اۋىلى بلاگودات ورتا مەكتەبىن اياقتاعان. 2008-2010 جىلدارى استانا قالاسى «قارجى اكادەمياسى» كوللەدجىن تەحنيك باعدارلاماشى ماماندىعى بويىنشا ۇزدىك ديپلوممەن بىتىرگەن.

2011-2012 جىلدارى  ەرەيمەنتاۋ اۋدانى جۇمىسپەن قامتۋ ورتالىعىندا تەحنيك-باعدارلاماشى لاۋىزىمىندا بولعان. 2012-جىلدان بەرى ولجاباي باتىر اۋىلىنىڭ ورتا مەكتەبىندە ينفورماتيكا ءپانىنىڭ ءمۇعالىمى.  قازىرگى تاڭدا پاۆلودار مەملەكەتتىك پەداگويكالىق ينستيتۋتىنىڭ ينفورمايتكا ءپانى ءمۇعالىمى ماماندىعى بويىنشا سوڭعى كۋرستا سىرتتاي بولىمدە وقۋىن جالعاستىرۋدا. قازاق ورىس تىلدەرىن مەڭگەرگەن. ۇيلەنگەن. ءبىر قىزدىڭ اكەسى.

ءار ءتۇرلى قوعامدىق شارالارعا بەلسە قاتىسىپ جان-جاقتى قىرمەن تانىلىپ حالىق قالاۋلىسى اتانعان  ەرعالي الداعى حالىقتىڭ سەنىمىن اقتايدى دەپ سەنەمىز. الداعى جۇمىس ساپارىڭا ساتتىلىك، ىستەرىڭە ونىمدىلىك تىلەيمىز.

ەردوس جانابىل ۇلى