بۇگىن قازاقستاندىق كاسىپقوي بوكسشى، WBA (Super)، IBO، WBC (Interim) جانە IBF ۆەرسيالارىنىڭ ورتاشا سالماقتاعى چەمپيونى گەنناديي گولوۆكين Jordan Brand اتريبۋتيكاسىن شىعارۋشىلارمەن كەلىسىم-شارتقا وتىرعانىن اقپارات قۇرالدارى جازۋدا. بۇل تۋرالى «قامشى» پورتالى حابارلايدى.

Jordan Brand – اتاقتى Nike ساۋدا بەلگىسى مەن باسكەتبولشى مايكل دجورداننىڭ بىرىككەن جوباسى. گەنناديي گولوۆكين بۇل برەندپەن كەلىسىمگە وتىرعان اندرە ۋورد پەن كىشى روي دجونستان كەيىنگى ءۇشىنشى بوكسشى. وسى ۋاقىتقا دەيىن بۇل ماركانىڭ وكىلى بولۋ باقىتى بارلىعى 50 سپورتشىعا عانا بۇيىرعان كورىنەدى.

كومپانيا پرەزيدەنتى لارري ميللەر وسى وقيعاعا قاتىستى: «ءبىز گەننادييدى ءوز وتباسىمىزعا قابىلداعانىمىزعا قۋانىشتىمىز»، - دەسە، بوكسشىنىڭ ءوزى تۋيتتەردەگى پاراقشاسىنا: «Jordan Brandء-تىڭ ءبىر بولشەگى بولعانىما قۋانىشتىمىن»، - دەپ جازدى.

وتاندىق بوكسشىنىڭ الەمدىك برەند يەلەرىمەن تەڭ دارەجەدە قارىم-قاتىناس ورناتىپ، ءوزىن مويىنداتقانى قۋانىشتى، ارينە. الايدا، Jordan Brand يەلەرىنىڭ ءبىر قىلىعى قىنجىلتىپ وتىر.

كومپانيا بوكسشىمەن جاسالعان كەلىسىمنىڭ نىشانى رەتىندە گ. گولوۆكينگە تابانىنىڭ ىشكى جاعىنا قازاقستان تۋىنداعى كۇن مەن بۇركىت بەينەلەنگەن اياق كيىم سىيعا تارتتى.

ءبىراز ۋاقىت بۇرىن ۇلتتىق ناقىشتاعى دەلىنگەن شاپانىنىڭ ويۋى قوعام تالقىسىنا تۇسكەن گەننادييدى ەندى نە كۇتىپ تۇر ەكەن؟