ءال-فارابي اتىنداعى قازاق ۇلتتىق ۋنيۆەرسيتەتىندە 15 ساۋىردە ەلىمىزدىڭ جانە تۇركى الەمىنىڭ تاريحىنداعى ۇلى قايراتكەرلەردىڭ ءبىرى، "الاش" ۇلت-ازاتتىق قوزعالىسىنىڭ نەگىزىن قالاۋشى ءارى كوسەمى،  ساياسي قايراتكەر ءاليحان بوكەيحانوۆتىڭ تۋعانىنا 150 جىل تولۋىنا ارنالعان "ءاليحان بوكەيحانوۆ جانە "الاش مۇراسى" اتتى عىلىمي-تاجىريبەلىك كونفەرەنسيا وتەدى، - دەپ حابارلايدى «قامشى» پورتالى.

كونفەرەنسياعا قازاقستان رەسپۋبليكاسىنىڭ مەملەكەتتىك حاتشىسى گ. ن. ءابدىقالىقوۆا، ءال-فارابي اتىنداعى قازۇۋ رەكتورى، اكادەميك ع. م. مۇتانوۆ، ق ر مادەنيەت جانە سپورت ءمينيسترى ا. مۇحامەدي ۇلى، ق ر پارلامەنتى سەناتىنىڭ دەپۋتاتى، قازاقستان جازۋشىلار وداعىنىڭ ءتوراعاسى ن. م. ورازالين جانە باسقا عىلىم، ءبىلىم جانە مادەنيەت قايراتكەرلەرى قاتىسادى.

كونفەرەنسيا جۇمىسى «الاش» ۇلت-ازاتتىق قوزعالىسى مەن ەلىمىزدىڭ تاۋەلسىزدىك الۋىنا ولشەۋسىز ۇلەس قوسقان قوزعالىس كوشباسشىلارىنىڭ مۇراسىن تاراتۋ مەن قالىڭ كوپشىلىككە دارىپتەۋگە باعىتتالعان. ازاتتىقتى اڭساعان بابالارىمىزدىڭ ۇلى مۇراتى قازاقستان رەسپۋبليكاسىنىڭ ءبىرىنشى پرەزيدەنتى ن.ءا.نازاربايەۆ تۇسىندا جۇزەگە استى. عالىمداردىڭ پىكىرىنشە، پرەزيدەنت العا تارتقان "ماڭگiلiك ەل" يدەياسى "الاشتىڭ" نەگىزگى ۇستانىمى – قازاق بوستاندىعىمەن تىعىز ۇندەسىپ جاتىر.

ءا.بوكەيحانوۆتىڭ وزىق ويلى يدەيالارى ونى ەۋروپا مەن ازيانىڭ كورنەكتى ساياسي قايراتكەرلەرىمەن ءبىر دەڭگەيگە قويدى. بۇگىندە ونىڭ 150 جىلدىق تويى يۋنەسكو كولەمىندە تويلانۋدا. ءا. بوكەيحانوۆ پاتشالىق رەسەي ۋاقىتىندا دا، كەڭەس ۇكىمەتى كەزىندە دە قازاقتاردىڭ ەركىندىگى ءۇشىن كۇرەستى. ءۇش رەت جازاعا تارتىلعان ول 1937 جىلى اتۋ جازاسىنا كەسىلدى. تەك جارتى عاسىر وتكەننەن كەيىن عانا جازىقسىز جالادان اقتالدى. 

كونفەرەنسيادا م. و. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى، ءۋاليحان  قاليجان ۇلى «ۇلتتىڭ ۇلى تۇلعاسى»؛ ق ر بعم تاريح جانە ەتنولوگيا ينستيتۋتىنىڭ ديرەكتورى، تاريح عىلىمىنىڭ دوكتورى، پروفەسسور حانگەلدى ءابجانوۆ «ءا. بوكەيحانوۆ جانە ۇلتتىق تاريحتى زەرتتەۋ مەتودولوگياسى»؛  ق ر ۇعا كوررەسپوندەنت-مۇشەسى،  تاريح عىلىمىنىڭ دوكتورى، پروفەسسور  مامبەت قويگەلدى «ءاليحان بوكەيحان – قازاق ۇلتتىق قوزعالىسىنىڭ كوسەمى»؛ مەملەكەتتىك سىيلىق يەگەرى، اكادەميك و. سابدەن «الاش يدەياسى ارقىلى وركەنيەتكە جاڭا قادام" اتتى باياندامالار جاسايدى، سونىمەن قاتار وزگە دە كوپتەگەن باياندامالار تىڭدالادى.

كونفەرەنسيا اياسىندا ءا.بوكەيحانوۆتىڭ ەڭبەكتەرىنە ارنالعان كىتاپ كورمەسى وتەدى، پۋبليسيست مۇحامەدجان سەرالين 1911 جىلى نەگىزىن قالاعان "ايقاپ" جۋرنالىنىڭ جاڭا سانىنىڭ تۇساۋكەسەرى بولادى.