بۇگىن، 24 ساۋىردە اتىراۋدا يساتاي-ماحامبەت الاڭىندا 100-دەن استام ادام رۇقسات ەتىلمەگەن ميتينگكە شىقتى. ولار جەردى شەتەلدىكتەرگە ساتۋعا مۇمكىندىك بەرەتىن جەر كودەكسىندەگى وزگەرىستەرگە قارسى نارازىلىق بىلدىرۋدە.

قالاداعى بەلسەندىلەر زاڭعا سايكەس، ون كۇن بۇرىن قالالىق اكىمدىككە 24 ساۋىردە ميتينگ وتكىزۋگە ءوتىنىم بەرگەن ەدى، ءبىراق ولارعا رۇقسات بەرۋدەن باس تارتىلدى. ءسويتىپ ادامدار وزدەرى جينالدى. ميتينگكە شىعۋشىلارعا اتىراۋ قالاسىنىڭ اكىمى نۇرلىبەك وجايەۆ، وبلىس اكىمىنىڭ ورىنباسارى ءسالىمجان ناقپايەۆ كەلدى. ولار جينالعاندارعا جاڭا جەر كودەكسىندە قازاقستاننىڭ ەگەمەندىگىنە ءقاۋىپتى ەشتەڭە جوق ەكەندىگىن تۇسىندىرۋگە تىرىستى، الايدا ولاردى دۇرىس تىڭدامادى. بەلسەندىلەردىڭ سوزدەرىن تىڭداعان قالا اكىمى ميتينگ پوزيسياسىن وبلىس اكىمىنە جەتكىزۋگە ۋادە بەردى. بەلسەندىلەر ءوز كەزەگىندە ادامداردى "ارانداتۋعا بەرىلۋمەۋگە"، ميتينگ بەيبىت بولۋ ءۇشىن وزدەرىن ءتارتىپتى ۇستاۋعا شاقىردى. الاڭدا پوليسيا مەن "شتاتتىق" كيىمدەگى ادامدار كوپ بولدى.

اكىم، قالا پروكۋرورى جانە باسقا دا لاۋازىمدى تۇلعالار ميتينگىدەن كەتتى. الاڭدا كوپتەگەن ادامدار، سونىڭ ىشىندە ايەلدەر مەن بالالار قالدى. جينالعاندار اراسىندا اۋىل تۇرعىندارىنىڭ كوپ ەكەنى بايقالادى. الاڭدا ادامدار ۋاقىت وتكەن سايىن مولايا تۇسۋدە.

الاڭداعى ميتينگ جالعاسىپ جاتىر، قاراباتاننان جانە وبلىستىڭ باسقا دا مۇناي پوسەلكەلەرىنەن ۆاحتاشىلار كەلىپ، مىنبەگە شىعىپ، وزدەرىنىڭ بەلسەندى لىكتەرىن تانىتۋدا. جەرگىلىكتى ۋاقىت ساعات 14.00 شاماسىندا (استانا ۋاقىتىمەن 15.00) الاڭعا جينالعان حالىق مىڭنان استى.

14.30. الاڭعا اتىراۋ وبلىسىنىڭ اكىمى نۇرلان نوعايەۆ كەلىپ، ميتينگىگە شىعۋشىلارمەن كەلىسسوزدەر جۇرگىزدى. وبلىس اكىمىمەن كەلىسسوزدە ەرەۋىلشى حالىق تاڭەرتەڭ قۇقىققورعاۋشى ورگاندار كوتەرگەن 8 ازاماتتىق بەلسەندىگە قاتىستى قىلمىستىق ءىستى توقتاتۋدى تالاپ ەتتى. بۇل ونىڭ قۇزىرەتىندە ەمەستىگىن مالىمدەگەن وبلىس اكىمى الاڭنان كەتتى. ميكروفوندار جۇمىس جاسامايدى جانە حالىقتىڭ شۋىنان ءسوز سويلەۋشىلەردىڭ سوزدەرى انىق ەستىلمەيدى. اكىم كەتكەننەن كەيىن ميتينگىشىلەر قالا پروكۋرورى رۋفات قۇتتىقوۆتىڭ اتىن اتاپ، وعان دا وسى تالاپتاردى قويدى.

15.30-دا نارازىلىققا شىعۋشىلارمەن اتىراۋ قالاسىنىڭ اكىمى رۋفات قۇتتىقوۆ كەلىسسوزگە كىرىستى. ودان حالىق الدىندا جوعارىدا اتالعان 8 بەلسەندىنى جانە بۇگىنگى ميتينگىگە قاتىسقانداردىڭ بىردە-بىرىن جاۋاپقا تارتپايمىز دەپ ءسوز بەرۋىن تالاپ ەتتى. پروكۋرور مۇنداي ۋادە بەرۋگە قۇقىلى ەمەستىگىن ايتىپ، ءبارى زاڭ جۇزىندە شەشىلەدى دەپ مالىمدەدى. 

16.00-دە وبلىس جانە قالا اكىمدەرى الاڭعا ورالىپ، ادامدارمەن كەلىسسوزدەرىن جالعاستىردى. وبلىس اكىمى ميتينگىگە قاتىسۋشىلارعا ەشكىم قۋدالانبايتىنىن مالىمدەدى. جينالعاندار ونىڭ حالىق الدىندا ۋادە بەرۋىن تالاپ ەتتى. اكىم بۇعان ءوزىنىڭ قاشان دا ءوز سوزىنە جاۋاپ بەرەتىنىن ايتتى. ەرەۋىلشىلەر تاراپىنان جەردى ساتۋ جانە جالعا بەرۋدى توقتاتۋ تۋرالى تالاپتار قويىلدى. نوعايەۆ جينالعاندارعا ميتينگىشىلەردىڭ تالاپتارىنا ناقتى جاۋاپ بەرۋ ءۇشىن زاڭ بويىنشا بيلىكتىڭ 21 مامىرعا دەيىن ۋاقىتى بار ەكەنىن ءتۇسىندىردى.

16.30-دا ميتينگىگە قاتىسۋشىلاردىڭ اراسىنداعى ءبىر اقساقال باتا بەرىپ، ەرەۋىلشىلدەر بەيبىت تاراي باستادى.

ازامات مايتانوۆ

زۋلفيا باينەكەيەۆا

سۋرەتتەر مەن بەينە جازبانى تۇسىرگەن اۆتور

Azh.kz