بۇكىلالەمدىك بوكس كەڭەسىنىڭ (WBC) پرەزيدەنتى ماۋريسيو سۇلەيمان WBC تۇجىرىمى بويىنشا ورتا سالماقتا الەمنىڭ ۋاقىتشا چەمپيونى گەنناديي گولوۆكيننىڭ ايگىلى ساۋل الۆارەسپەن قاشان كەزدەسەتىنىن ايتتى، - دەپ حابارلايدى Vesti.kz.

ايتا كەتەيىك، ۇيىمنىڭ شەشىمىنە سايكەس ەكى بوكسشى دا وسى تيتۋلدى قورعاۋعا مىندەتتى. "ەكى تاراپ جاساسقان كەلىسىم بار. 7 مامىردان كەيىن ەكى بوكسشىعا كەلىسىمگە كەلۋگە ءبىر اي ۋاقىت بەرىلدى. ەگەر ولار ءوزارا كەلىسە الماسا، ءبىز پروموۋتەرلىك ساۋدا ۇيىمداستىرامىز"، - دەدى سۇلەيمان گولوۆكين - ۋەيد كەزدەسۋىنەن كەيىن ESPN تەلەارناسىنا بەرگەن سۇحباتىندا.

ونىڭ ايتۋىنشا، WBC كەز كەلگەن جاعدايدا ەرەجەگە سۇيەنىپ شەشىم قابىلدايدى. "ءدال ءقازىر گولوۆكين - ۋاقىتشا چەمپيون، الۆارەس - نەگىزگى چەمپيون. بۇل ماسەلە بۇرىننان قارالىپ كەلە جاتىر. سەرحيو مارتينەسپەن مىندەتتى جەكپە-جەك وتكەننەن كەيىن ميگەل كوتتو گولوۆكينمەن كەلىستى. وسىدان كەيىن گولوۆكين وعان الۆارەسپەن كەزدەسۋگە رۇقسات بەردى. ساۋل جەڭىسكە جەتتى، سوسىن ول تاعى ءبىر كەزدەسۋگە رۇقسات سۇرادى، سودان كەيىن عانا گولوۆكينمەن جۇدىرىقتاسۋعا دايىن ەكەنىن ايتتى. ءقازىر ءبىز 7 مامىردى كۇتۋىمىز كەرەك. وسىدان كەيىن عانا گولوۆكين مەن الۆارەس - حان كەزدەسۋىنىڭ جەڭىمپازىمەن جەكپە-جەك ۇيىمداستىرۋعا كىرىسەمىز"، - دەدى سۇلەيمان.

ءوز كەزەگىندە بۇكىلالەمدىك بوكس اسسوسياسياسىنىڭ (WBA) باسشىسى حيلبەرتو مەندوس گولوۆكين - الۆارەس جەكپە-جەگى بولماعان جاعدايدا، قازاقستاندىق بوكسشىنى ورتا سالماقتا WBA (Regular) چەمپيونى دەنيەل دجەيكوبسپەن كەزدەسۋگە مىندەتتەيتىنىن ايتتى. "ءبىز تيتۋلدى قورعاۋ جەكپە-جەگىن ۇيىمداستىرعىمىز كەلەدى، دەگەنمەن WBC ۇيىمىنا كەدەرگى كەلتىرمەيمىز"، - دەدى ول.