بۇگىن استانادا ءوتىپ جاتقان قازاقستان حالقى اسسامبلەياسىنىڭ ءححىۇ سەسسياسى بارىسىندا ەلباسى نۇرسۇلتان نازاربايەۆ وسىلاي مالىمدەدى، - دەپ حابارلايدى Qamshy.kz.

پرەزيدەنت ەل اراسىنداعى جەر ۋچاسكەلەرىن شەتەلدىكتەر يەلەنىپ كەتەدى دەگەن سىبىستىڭ شىندىققا جاناسپايتىنىنا نازار اۋدارتتى.

«سوڭعى ۋاقىتتا جەر ماسەلەسىنە ەرەكشە نازار اۋدارىلۋدا. قازاقستاندىقتار اراسىندا جەر شەت ەل ازاماتتارىنا ساتىلادى دەگەن جالعان اقپارات تاراۋدا. اۋىلشارۋاشىلىق جەرلەرىن شەتەل ازاماتتارى مەن كومپانيالارىنا ساتۋ تۋرالى ماسەلە جوق، ونداي ماسەلە قاراستىرىلمايدى دا. بۇل تاقىرىپتاعى سپەكۋلياسيالاردىڭ بىرەۋى دە نەگىزسىز، ارانداتۋشىلار انىقتالىپ ەل زاڭدارىنا ساي جاۋاپقا تارتىلاتىن بولادى. ءتىپتى، بىزدەن جەر العان ج ش س شەتەلدىك ينۆەستور تارتىپ، ولارعا ءوز اكسياسىن بەرەتىن بولسا، وندا ول جەر قايتادان ارەنداعا وتەدى. ماسەلە فەرمەرلەرگە مەنشىك يەلەنۋ، جەر يەلەنۋ مۇمكىندىگىن بەرۋدە بولىپ وتىر. ءبىز بۇعان دەيىن جەردى جالعا الۋ مەرزىمى 10 جىل بولعانىن ايتتىق. ءبىراق، بۇل ۋاقىت ىشىندە شەتەلدىك ينۆەستورلاردىڭ ەشقايسىسى سالعان اقشالارىن قايتارا المايدى. سوندىقتان ءبىز ارەندا مەرزىمىن 25 جىلعا ۇزارتتىق. سالىستىراتىن بولساق، رەسەيدى بۇل مەرزىم 49 جىل، باا-دە – 99 جىل، ەۋروپادا – 49، 59، 99 جىلدى قۇرايدى. بۇدان سونشا نە جاماندىق كوردىڭىزدەر؟ شۋلاپ جۇرگەندەر قىرماندا جۇمىس ىستەيتىندەر ەمەس، اۋىلشارۋاشىلىعىنان مۇلدەم حابارسىز، ول جەرلەردىڭ قايدا ورنالاسقانىن دا بىلمەيتىندەر!»، - دەدى ن. نازاربايەۆ.

كەشە ەلباسى وسى ماسەلەگە قاتىستى ءسوز قوزعاپ، ەلدىڭ باس پروكۋراتۋراسىنا جەرگە قاتىستى زاڭنامالاردى دۇرىس ءتۇسىندىرۋ تۋرالى تاپسىرما قويعان بولاتىن.