ادۆوكات جانگەلدى سۇلەيمەنوۆ ەلدە تۇراقتىلىقتى ساقتاۋ ماقساتىندا الەۋمەتتىك جەلىلەردى جابۋدى ۇسىندى. ونىڭ ايتۋىنشا، الەۋمەتتىك جەلىلەردىڭ جۇمىسىن رەتتەيتىن زاڭ قابىلدانعانشا ونداي جەلىلەردىڭ قىزمەتىنە ۋاقىتشا توسقاۋىل قويىلۋ كەرەك.
زاڭگەر فەيسبۋك، ۆكونتاكتە، تۋيتتەر، ينستاگرام سىندى جەلىلەردى جۇمىس ۋاقىتىندا پايدالانۋدى، وندا بۇركەنشىك اتتار مەن پسيەۆدونيمدەر قولدانۋدى، بالالاردىڭ پايدالانۋىن شەكتەيتىن تالاپتار ەنگىزۋ كەرەك دەپ سانايدى. سونداي-اق، ج. سۇلەيمەنوۆ الەۋمەتتىك جەلىدە جالعان اقپارات تاراتقاندارعا جاۋاپكەرشىلىك جۇكتەۋ تەتىكتەرىن دە قاراستىرۋدى ۇسىندى. زاڭگەردىڭ سوڭعى ۇسىنىستى نە ءۇشىن ايتىپ وتىرعانىن تۇسىنبەدىك. ويتكەنى، قولدانىستاعى زاڭنامالاردا جالعان اقپارات تاراتۋعا بايلانىستى جاۋاپكەرشىلىك نورمالارى كورسەتىلگەن.
«الەۋمەتتىك جەلىلەر وكىنىشكە وراي، ۇلتتىق، الەۋمەتتىك الاۋىزدىق، ەلدە تۇراقسىزدىق تۋعىزۋدى كوزدەيتىن زياندى اقپاراتتاردى قوعامعا تاستاۋ ءۇشىن ءجيى پايدالانىلادى. ارينە، الەۋمەتتىك جەلىلەردىڭ قوعامداعى ناقتى جانە پايدالى ماسەلەلەردى شەشۋگە پايدالانىلاتىنى جاسىرىن ەمەس. ماسەلەن، وسىنداي جەلىلەر جەردى جالعا بەرۋگە قاتىستى بيلىكتىڭ نازارىن اۋدارتۋعا كومەكتەستى. الەۋمەتتىك جەلىلەرگە ۋاقىتشا شەكتەۋ قويۋ ازاماتتاردىڭ اقپارات الۋ قۇقىعىن ەشقانداي دا شەكتەيدى دەپ ويلامايمىن. بۇدان زارداپ شەكسە، تەك بلوگەرلەر زارداپ شەگەدى. ولار ۋاقىتشا پوست جازا الماي قالادى، ولاردىڭ وقىرماندارى دا بلوگەردىڭ نە ىشكەنى، نە جەگەنى، نە ساتىپ العانى تۋرالى وقي الماي قالادى. سوندىقتان، ازاماتتار بۇل اقپاراتتارسىز بىرنەشە اي ءومىر سۇرە الادى دەپ ويلايمىن»، - دەيدى ادۆوكات.
ج. سۇلەيمەنوۆ مۇنداي شەكتەۋدىڭ زيانىنان پايداسى الدەقايدا كوپ بولاتىن كورىنەدى. وسى جەردە زاڭگەر بالالاردىڭ جەلى تەلمىرۋى، ادامداردىڭ كۇنى-تۇنى ۋاقىتىن جەلىدە وتكىزۋى سىندى تۇرمىستىق دەڭگەيدەگى دۇنيەلەردى العا تارتا وتىرىپ، قوعامدىق ماعىزدى ماسەلە كوتەرىپ وتىر. بۇل اڭگىمە بۇرىن دا ءسوز بولعان. سەكسۋالدىق سيپاتتاعى، ينتيمدىك قىزمەتتەردى ناسيحاتتايتىن كونتەنتتەر شىنىمەن دە جەلىدە جەتىپ ارتىلادى. ول تۋرالى دابىل قاعىپ، ءتىپتى، ءتيىستى زاڭ قابىلداۋ قاجەتتىلىگىن تالاپ ەتكەندەر بۇعان دەيىن دە كوپ بولعان. ال، الەۋمەتتىك جەلىنى شەكتەۋ تۋرالى اڭگىمەنىڭ بۇل جولى قايتا كوتەرىلۋى بالالاردىڭ تاربيەسىنە، رۋحاني-مورالدىق قۇندىلىقتارعا الاڭداۋشىلىقتان گورى ساياسي سەبەپتەرگە كوپ قاتىستى سياقتى.
جومارت ابدوللا ۇلى
