سەمەيدە 9 مامىرداعى جەڭىس كۇنىنە ارنالعان الەۋمەتتىك جارناما قالا تۇرعىندارى مەن ارداگەرلەردىڭ ىزاسىن كەلتىردى. تۇرعىندار باننەردەگى "اتالارىمىز ءفاشيزمدى جەڭدى، ال ءبىز داعدارىستى جەڭەمىز" دەگەن سويلەمدى دورەكى قولدانىلعان دەپ ەسەپتەيدى، - دەپ حابارلايدى كتك.

باننەر قالا ورتالىعىندا وسىدان ەكى كۇن بۇرىن ورناتىلعان ەكەن. ول ينتەرنەتتە دە قىزۋ تالقىلانىپ جاتىر. ءبىرى مۇنى ناداندىق دەسە، ەندى ءبىرى ارداگەرلەردى مازاق قىلۋ دەپ توپشىلاعان. ءتىپتى "ەكونوميكالىق داعدارىستى جەڭۋ ءۇشىن كىممەن سوعىسۋ كەرەك؟" دەگەن مىسقىل سۇراقتار دا قويىلىپتى.

اسىرەسە، سوعىس ارداگەرلەرى سۇراپىل جىلداردى داعدارىسپەن سالىستىرعاندارعا رەنىشتەرىن ءبىلدىرىپ وتىر. "مىنانى جاساعان ادام ساۋاتسىز. ول سوعىستا بولعان جوق. سوندىقتان وندا توگىلگەن قاندى بىلمەيدى. وعان اكەپ داعدارىستى تەڭەپ وتىر. ال بۇل ەكونوميكالىق جاعدايدا ەشكىم ءبىر-بىرىن اتپايدى عوي. اسىرا سىلتەپ جازباس بۇرىن ويلانۋ كەرەك"، - دەدى سوعىس ارداگەرى پەتر كولومەن.

نەشە كۇننەن بەرى جۇرت جۇمىلىپ سىناعان باننەرگە قالالىق اكىمدىك تاپسىرىس تا، رۇقسات تا بەرمەگەن. ونىڭ يدەياسىنان بۇرىن تىلگە قاتىستى زاڭدىلىق تا ساقتالماپتى. ەندى ساياسات بولىمىندەگىلەر "ورىسشا باننەرگە تىلدەردى دامىتۋ ءبولىمى شارا قولدانادى" دەيدى.