جەر تاعدىرىنا الاڭ بولعان اتىراۋلىق اعايىننىڭ، استانا، الماتى، ورال قالالارىندا وتكەن نارازىلىق شارالارىنداعى ەلدىڭ تالابى ەلباسىنىڭ قۇلاعىنا جەتتى. «انا ءتىلىمىز قاعاجۋ كورەدى. جاس ۇرپاق ماڭگۇرتتەنۋى مۇمكىن» دەپ كوپشىلىك دابىل قاققان «ءۇش ءتىلدى وقىتۋ» جۇيەسىنە، جالپى ءبىلىم رەفورماسىنا قاتىستى دا پرەزيدەنت پىكىرىن ءبىلدىردى.

الدىڭعى كۇنى باس پروكۋراتۋراداعى جيىندا ەلباسىنىڭ زاڭدار ءتيىستى دەڭگەيدە حالىققا تۇسىندىرىلمەيدى دەگەنى تەگىن ەمەس. ەلباسى ەل ىشىندەگى اڭگىمەدەن حابارى بولماسا، حالىقتىڭ نارازىلىعىن سەزبەسە مۇنداي مالىمدەمە جاسار ما ەدى؟

كەشەگى وتكەن حالىق اسسامبلەياسىنىڭ سەزىندە دە جەر ماسەلەسى كوتەرىلدى. پرەزيدەنت كوپتى الاڭداتقان وزەكتى ماسەلەگە نۇكتە قويارلىق سوزدەر ايتتى. «قازاقتىڭ دالاسى – حالىقتىڭ مەنشىگى. قازاقستاننىڭ 14 مىڭ شارشى كم شەكاراسىن شەگەندەۋ ءۇشىن مەن 8 جىل كەلىسسوزدەر جۇرگىزدىم» دەگەن ن.نازاربايەۆ مەملەكەت جەردىڭ جات جۇرتتىقتاردىڭ مەنشىگىنە ءوتىپ كەتپەۋى ءۇشىن بار قاجەتتى جاسايتىنىن باسىپ ايتتى.

ءبىلىم جۇيەسىندەگى بىلىقتان دا ءبىرازىمىز حاباردارمىز. تومەنگى سىنىپ وقۋشىسى كۇن سايىن مەكتەپكە ارقالاپ باراتىن سومكەسىنىڭ سالماعى ونىڭ مەكتەپتە الاتىن ءبىلىمىنىڭ سالماعىنا ساي ەمەستىگىن دە بىلەمىز. ءبىز عانا ەمەس، ونى ەلباسى دا بىلەتىن سياقتى. ءبىلىم جانە عىلىم ءمينيسترى ە. ساعادييەۆتى سىناعان ەلباسىنىڭ ناقتى پاندەرگە قاتىستى ايتقاندارى ازىرگە ۇسىنىس كۇيىندەگى سوزدەر ەكەنىن ەسكەرە وتىرىپ، پرەزيدەنت بۇل تاراپتى دا باقىلاۋىندا ۇستاپ وتىرعانىن كورەسىز.

بۇلاردى تىزبەكتەي وتىرىپ ايتپاعىمىز نە؟ ايتپاعىمىز، حالىق ءۇنىن ەستىر قۇلاققا جەتكىزەتىن جولدار بار. ول جولدى دا حالىقتىڭ ءوزى تاۋىپ وتىر. وسى كۇنگە دەيىن ەل ازاماتتارىنىڭ بيلىك ورگاندارىنا باعىتتاعان ءتۇرلى اشىق حاتتارى مەن پەتيسيالارىنا كوپشىلىك تۇرلىشە باعا بەردى. ءبىرىمىز جارىسا قولداپ، قول قويساق، ەندى ءبىرىمىز «ونبەيتىن ءىس» دەپ قولدى ءبىر-اق سىلتەدىك. ءتىپتى، ءبىلىم بەرۋ سالاسىنداعى رەفورمالارعا الاڭداۋشىلىق بىلدىرگەن حالىقتىڭ اشىق حاتىن سالا باسشىسى «ولار وزدەرىن عانا ويلايتىن ەگويستەر. باسقا جۇرتتىڭ ساپالى ءبىلىم العانىن كورە المايدى» دەپ ايىپتاۋعا دەيىن باردى. ە. ساعادييەۆ مىرزا كەشە سول سوزدەرىن نەگە ەلباسىنىڭ الدىندا ايتپادى؟ اشىق حات جازعاندار «بايدىڭ مالىن قىزعانعان بايقۇستار» ەكەنىنە سەنىمدى بولسا، «شۋ كوتەرگىش، وڭباعانداردىڭ ايىبىن» بەتتەرىنە باسار ەدى عوي. ولاي ىستەي المادى.

دەمەك، حالىق بەلسەندىلەرى ۇيىمداستىرعان اشىق حاتتار ءوز مىندەتىن اتقاردى. ەلدىڭ ءۇنى ەلباسىعا جەتتى. بۇل – ءسوزسىز حالىقتىڭ جەڭىسى. ال، كەشەلى بەرى كوتەرىلىپ جاتقان «الەۋمەتتىك جەلىلەردى جابۋ كەرەك» دەگەن باستامالار، ەلباسىنى ەلىنەن قىزعانعان الدەبىر توپتاردىڭ ارەكەتى بولۋى مۇمكىن.

دارحان مۇقانتەگى