قاراعاندى ءوڭىرىنىڭ باسشىلارى بىرىنەن سوڭ ءبىرى جالاقىلارىن جاريا ەتىپ جاتىر. ناقتىراق ايتقاندا تابىستارى مەن جەكە مۇلىكتەرىن ءوز ەرىكتەرىمەن ەمەس،  جاريا ەتۋگە تۋرا كەلگەندىكتەن اشىق كورسەتكەن، - دەپ حابارلايدى Qamshy.kz پورتالى 31 ارناعا سىلتەمە جاساپ.

وبلىس اكىمى نۇرمۇحامبەت ابدىبەكوۆ باستاعان تىزىمدە لاۋازىمدى تۇلعالار ۇي-جايىمەن بىرگە، جىلىنا قانشا اقشا تاباتىندارىن اشىق جاريالاۋدا.

قاراعاندى وبلىسى اكىمى نۇرمۇحامبەت قاناپيا ۇلىنىڭ تابىسى - 953 260 تەڭگە، قالا باسشىسى نۇرلان اۋباكىروۆتىڭ ايلىعى 630 مىڭعا تەڭ. قالا اكىمى 2015 جىلدىڭ ىشىندە 7 000 646 تەڭگەنىڭ باسىن قۇراپ ۇلگەرگەن. ال مەملەكەتتىك قىزمەت تىزگىنىن ۇستاعان شەنەۋنىكتەر اراسىندا «ساۋلەت جانە قالا قۇرىلىسى» ءبولىمى جەتەكشىسىنىڭ ايلىعى ەڭ تومەن ەكەن. سابىرجان داۋىتبەرگەنوۆتىڭ ءبىر جىلدىق ايلىعى 1 000 237 تەڭگەنى قۇراپتى.

ءبىراق اي سايىن قولىنا ءبىر ميلليون تەڭگەدەي تۇسەتىن ايماق باسشىسى نۇرمۇحامبەت ابدىبەكوۆتىڭ سالىقتىق دەكلاراسياسىندا دۇنيە-مۇلكى جايلى ايتىلماعان. قوماقتى قارجىعا جۇمىس جاساپ جۇرگەن قاراعاندى وبلىسنىڭ اكىمى ءۇيدى جالداپ تۇرادى ەكەن. ەسەسىنە، قالا باسشىسى نۇرلان اۋباكىروۆتىڭ مەنشىگىندە 10 جۇزدىك جەر بار. ال قالا اكىمى جۇبايىنىڭ اتىندا ءبىر، ەكى جانە ءتورت بولمەلى ءۇش پاتەر بار ەكەن.

ءبىراق، ستاتيستيكا دەپارتامەنتىنىڭ سوڭعى كورسەتكىشىنە ساي، ەلىمىزدىڭ وندىرىسكە باي وڭىردەگى ادام باسىنا شاققانداعى ورتاشا ەڭبەكاقى ەسەبى - 100 مىڭعا تەڭ. ازىرگە، مەملەكەتتىك قىزمەتكەرلەر تابىسىن جاريا ەتۋ بويىنشا قاراعاندى ءوڭىرىنىڭ باسشىلارى كوش باستادى. ازىرگە ەلىمىزدىڭ وزگە وبلىستار مەن قالا اكىمدەرى مەملەكەتتەن بەرىلگەن جالاقىلارىن جاريا ەتپەك تۇگىلى،  اتتارىنا تىركەلگەن دۇنيە-مۇلىكتەرى تۋرالى ەشتەڭە جازباعان.