دەنساۋلىق ساقتاۋ مينيسترلىگىنىڭ مەديسينالىق جانە فارماسيەۆتيكالىق قىزمەتتى باقىلاۋ كوميتەتى الماتىداعى پەريناتولوگيا جانە بالالار كارديوحيرۋرگياسى ورتالىعىندا جۇرگىزگەن تەكسەرۋ بارىسىندا 60 بالانىڭ ولىمىنە الىپ كەلگەن جاعدايدى انىقتاي المادى.

«زاڭ بۇزۋشىلىقتار بولدى، ءبىراق ولار بالالاردىڭ ولىمىنە ەش اسەر ەتپەگەن. نەگىزىنەن ولار قۇجاتتاردى تولتىرۋ سياقتى فورمالدى قىزمەتتەرگە بايلانىستى» دەدى كوميتەت ءتوراعاسى باۋىرجان بايسەركين. تەكسەرۋ بارىسىندا ورتالىق اشىلعالى بەرى 57 بالانىڭ ءولىمى انىقتالعان، ونىڭ ىشىندە 13 قىزىلشاقا ءولى تۋعان. تەكسەرۋ ناتيجەلەرى بويىنشا جينالعان ماتەريالدار الماتى قالالىق قۇقىق قورعاۋ ورگاندارىنا بەرىلدى. ال بوستاندىق اۋدانىنىڭ پروكۋراتۋراسى تەكسەرۋدىڭ ناتيجەسىن جاريالاماعان. بۇل اۋداننىڭ پروكۋراتۋراسى الماتى قالالىق پەريناتولوگيا جانە بالالار كارديوحيرۋرگياسى ورتالىعىندا جىل باسىنان بەرى بالا ءولىمىنىڭ 60-قا جۋىق وقيعاسىن انىقتاعان، ونىڭ 30-ى جاڭا تۋعان نارەستە. دارىگەرلەردىڭ بولجامىنا سايكەس، نارەستەلەر جاتىرىشىلىك ينفەكسيادان شەتىنەگەن كورىنەدى. الايدا قۇزىرلى ورىندار بالالاردىڭ ءولىم وقيعالارىنىڭ ءاربىر فاكتىسى بويىنشا تەكسەرۋ جۇرگىزىلىپ، كىنالىلەر، سونىڭ ىشىندە لاۋازىمدى تۇلعالار دا مىندەتتى تۇردە جاۋاپكەرشىلىككە تارتىلاتىندىعىن حابارلادى. ايقىن