"ءالىبي ءىسى" بويىنشا ەلگە اتى شىققان كاسىپكەر قايرات جامالييەۆ 13 جىلدىق مەرزىمىن الماتى وبلىسى زارەچنىي ەلدى مەكەنىندە ورنالاسقان قاتاڭ رەجيمدەگى تۇزەۋ مەكەمەسىندە وتەپ جاتقانى بەلگىلى. بۇگىنگە دەيىن ول ءوزىنىڭ زاڭدى ايەلى ءالونا جامالييەۆامەن جانە ءوز اپكەسىمەن ەكى رەت كەزدەسكەن، - دەپ حابارلايدى استانا ارناسى. 

تۇرمەگە العاش كەلگەن كەزدە جامالييەۆتى كارانتيندى بولىمگە ورنالاستىرعان. ارتىنشا وزگە سوتتالۋشىلاردىڭ جانىنان جاتاقحانادان ورىن بەرىپتى. بۇگىندە ول 100-دەن استام اداممەن بىرگە جازاسىن وتەپ جاتىر. ەكس-كاسىپكەر دەپرەسسياعا تۇسپەي، سپورتتىق شارالارعا قاتىسىپ تۇرادى ەكەن. سونداي-اق، بوس ۋاقىتىندا شاحمات ويناپ، كىتاپ وقيدى دەيدى لا-155/8 مەكەمەسىنىڭ باسشىسى نۇرلان قالياقباروۆ تىلشىلەرگە بەرگەن سۇحباتىندا.

"مەكەمەنىڭ قوعامدىق ومىرىنە بەلسەندى ارالاسادى، ەشقانداي ەرەجە بۇزعان ەمەس. جالپى، مۇندا ەشكىمگە ەشقانداي ارتىقشىلىقتار كورسەتىلمەگەن، وزگە سوتتالۋشىلار سەكىلدى جازاسىن وتەپ جاتىر. العاشقى كەلگەن 15 كۇندە ول كارانتيندى بولىمدە بولدى" دەيدى مەكەمە باسشىسى.

جامالييەۆتىڭ ءوزى بولسا جۋرناليستەرمەن كەزدەسۋدەن ۇزىلدى-كەسىلدى باس تارتىپ كەلەدى. ال، تۇرمە باسشىلارى ونىڭ ءتارتىبىنىڭ جاقسى بولۋىنا بايلانىستى جەڭىلدەتىلگەن رەجيمدەگى تۇرمەگە اۋىسۋى مۇمكىن ەكەنىن ايتىپ وتىر. ەگەر اۋىسا قالسا جامالييەۆ تۋىستارىمەن ءجيى كورىسەتىن بولادى.

"تەك 9 اي وتكەننەن كەيىن عانا قاراستىرامىز. ەگەر ونىڭ ءتارتىبى جاقسى بولسا جەڭىلدەتىلگەن رەجيمگە اۋىسادى. ايىرماشىلىعى - تۋىستارىمەن كەزدەسۋلەردىڭ كوپتىگىندە عانا، وزگە ەرەكشەلىكتەرى جوق. ول جاقتا جىلىنا 4 ۇزاق جانە 4 قىسقا كەزدەسۋلەر ۇيىمداستىرىلادى" دەدى قالياقباروۆ.

ەستەرىڭىزگە سالايىق، قايرات جامالييەۆ بىلتىر استانا تۇرعىنى ءالىبي جۇماعۇلوۆتان توقالىن قىزعانىپ، ونى ءولىمشى ەتىپ ساباعان ەدى. كاسىپكەرگە ول كەزدە دوسى ارمان ابىلتايەۆ پەن جۇرگىزۋشىسى اناتوليي پريبىتكوۆ كومەكتەسكەن. سوت ۇكىمىنە سايكەس، ابىلتايەۆ 12 جىلعا، پريبىتكوۆ بولسا 8 جىلعا باس بوستاندىعىنان ايرىلدى.