2016 جىلعى 3 مامىردا قازاقستان رەسپۋبليكاسى ۇكىمەتىنىڭ قاۋلىسىمەن عاني قالىباي ۇلى سادىبەكوۆ قازاقستان رەسپۋبليكاسىنىڭ ەنەرگەتيكا ۆيسە-مينيسترى بولىپ تاعايىندالدى، - دەپ حابارلايدى Qamshy.kz Bag.kz سايتىنا سىلتەمە جاساپ.
عاني سادىبەكوۆ قازاق مەملەكەتتىك باسقارۋ اكادەمياسىنىڭ ەكونوميكالىق فاكۋلتەتىن، سونىمەن قاتار قىرعىز مەملەكەتتىك ۋنيۆەرسيتەتىنىڭ زاڭ فاكۋلتەتىن ءبىتىردى. ەڭبەك جولىن الماتى وبلىسىنىڭ «سالقىن-ساز» كووپەراتيۆىنەن باستادى، كەيىن الماتى قالاسى سوۆەت اۋدانىنىڭ اكىمدىگىندە شارۋاشىلىق ەسەپ قىزمەتىنىڭ ديرەكتورى جانە اتالعان مەكەمەدە ينفراقۇرىلىمدى جانە الەۋمەتتىك سالانى دامىتۋ ءبولىمىنىڭ مەڭگەرۋشىسى بولدى.
2004 جىلدان باستاپ الماتى قالاسى بويىنشا باس مەملەكەتتىك ەكولوگيالىق ينسپەكتور، كەيىن الماتى قالاسىنىڭ اۋماقتىق قورشاعان ورتانى قورعاۋ باسقارماسىنىڭ باسشىسى، سونان سوڭ ق ر قورشاعان ورتانى قورعاۋ مينيسترلىگىنىڭ بالحاش-الاكول ەكولوگيالىق دەپارتامەنتى باسشىسىنىڭ ورىنباسارى قىزمەتىن اتقاردى.
2009 جىلدان باستاپ بۇگىنگى كۇنگە دەيىن جامبىل وبلىسىنىڭ اكىم اپپاراتىنىڭ باسشىسى، جامبىل وبلىسى اكىمىنىڭ ورىنباسارى جانە پاۆلودار وبلىسى اكىمىنىڭ ورىنباسارى قىزمەتتەرىن اتقاردى.
قورشاعان ورتانى قورعاۋ سالاسىنداعى ۇلكەن جۇمىس تاجىريبەسىن ەسكەرە وتىرىپ، عاني سادىبەكوۆكە ق ر ەنەرگەتيكا مينيسترلىگىندە ەكولوگيا ماسەلەلەرىنە جەتەكشىلىك ەتۋ تاپسىرىلىپ وتىر. ول 2015 جىلدىڭ تامىز ايىنان باستاپ بوس بولعان لاۋازىمعا تاعايىندالدى.
