الماتى ۋنيۆەرسيتەتىندە 28 ءساۋىر كۇنى «ۋنيۆەرسيتەت ارۋى-2016» بايقاۋى بولىپ ءوتتى. سۇلۋ دا سىمباتتى،  اقىلىنا كوركى ساي، ءبىلىمدى دە ونەرلى ارۋدى انىقتايتىن بايقاۋعا قاتاڭ ىرىكتەۋدەن وتكەن 8 ستۋدەنت قاتىستى،-دەپ حابارلايدى Qamshy.kz.

سايىستا سۇلۋلار 7 نوميناسيا بويىنشا ب ا ق سىناستى. اتاپ ايتقاندا: سالەمدەسۋ، مانەرلەپ ولەڭ وقۋ، ۆيكتورينالىق سۇراقتار، ۇلتتىق تاعام، ءوز ونەرىن كورسەتۋ، كەيىپكەر بەينەسىن بەينەلەۋ، ءسان ۇلگىسى.

سۇلۋلار سايىسىنا قازىلار القاسىنان ۋنيۆەرسيتەت رەكتورى شىلدەباي ءسابيت قامىتبەك ۇلى، تاربيە ءىسى جونىندەگى پرورەكتور امانعالييەۆا سىمبات تلەگەن قىزى، ۋنيۆەرسيتەت پرفەسسورى ادىلبەكوۆا حاديشا كوندرات قىزى، كىتاپحانا مەڭگەرۋشىسى سۇلۋشاش ءادي قىزى جانە اعا وقىتۋشى نايمانباي الماس ءابدىماناپ ۇلى تورەلىك ەتتى.

الدىڭعى نوميناسيالارعا قاراعاندا كورىكتى قىزدار ءوز ونەرلەرىن كورسەتۋدە بىرىنەن-بىرى اسىپ ءتۇستى. ءبىرى، «تۇمار حانشايىمنىڭ» وبرازىندا شىقسا، ەندى ءبىرى «مۇگەدەك قىزدىڭ» ارمانى جايلى كورىنىس قويدى. «جەتىم قىزدىڭ» مونولوگى وقىلعاندا كورەرمەندەردىڭ كوزىنە جاس ءۇيىرىلدى. كەڭەس وداعىنىڭ باتىرى، قازاقتىڭ باتىر قىزى ءاليا مولداعۇلوۆانىڭ بەينەسىن سومداعاندا رۋحتانباعان جان قالمادى. "ەر تارعىن" جىرىنداعى ءاقجۇنىستىڭ بەينەسىن كورگەندە ارۋلارىمىزدىڭ بويىنان باتىرلىق پەن نازىكتىك قاتار كورىنىس تاپتى. جەتى ءتۇرلى سايىستى تاماشالاعان الماتى ۋنيۆەرسيتەتىنىڭ ستۋدەنتتەرى مەن كەش قوناقتارى قازاق قىزدارىنىڭ ونەرلەرىنە ءدان ريزا بولدى.

"ۋنيۆەرسيتەت ارۋى" اتانۋ - كەز-كەلگەن قىز بالاسىنىڭ ارمانى. سوندىقتان جەڭىمپازدى انىقتاۋ قازىلار القاسىنا وڭاي بولعان جوق. سونىمەن، الماتى ۋنيۆەرسيتەتىنىڭ "ۋنيۆەرسيتەت ارۋى-2016" بايقاۋىنىڭ جەڭىمپازى، ياعني باس جۇلدەنى سايىستىڭ باسىنان اياعىنا دەيىن بەلسەندى قاتىسقان «دەنە شىنىقتىرۋ جانە سپورت» ماماندىعىنىڭ 1 كۋرس ستۋدەنتى نازگۇل تايشىبەكوۆا جەڭىپ الدى. ءى ورىندى دا «دەنە شىنىقتىرۋ جانە سپورت»  ماماندىعىنىڭ 1 كۋرس ستۋدەنتى جانسۇلۋ ادىلبەكوۆا يەلەندى. ال، ءىى ورىن «ينفورماتيكا» ماماندىعىنىڭ 1 كۋرس ستۋدەنتى ايدانا كاليمبايەۆاعا بۇيىردى. ءىىى ورىندى ەكى بىردەي ستۋدەنت - اراي رايىمبەردييەۆا «پەداگوگيكا جانە پسيحولوگيا» ماماندىعىنان جانە «شەت ءتىلى» ماماندىعىنان ديانا ەرمەكوۆا لايىق دەپ تانىلدى. بايقاۋعا قاتىسۋشى «دەنە شىنىقتىرۋ جانە سپورت» ماماندىعىنىڭ ستۋدەنتى ديانا ازاماتوۆا "سۇيكىمدى ارۋ"، «باستاۋىش وقىتۋدىڭ پەداگوگيكاسى مەن ادىستەمەسى» ماماندىعىنىڭ ستۋدەنتى ايدانا مولداشيەۆا "ءبىلىمدى ارۋ"، «بيولوگيا» ماماندىعىنىڭ نامىسىن قورعاعان نازگۇل جۋسانباي «ونەرلى ارۋ» نوميناسيالارىن يەلەندى.

جەڭىمپازداردى قۇتتىقتاۋ راسىمىندە الماتى ۋنيۆەرسيتەتىنىڭ رەكتورى ءسابيت شىلدەباي «ۋنيۆەرسيتەت ارۋى-2016» بايقاۋىنا قاتىسۋشى قىزداردىڭ بارلىعىنا وقۋ اقىسىن تولەۋگە ون پايىز جەڭىلدىك بەرسە، باس ارۋعا جيىرما پايىز جەڭىلدىك جاساپ، باعالى سىيلىقتارمەن ماراپاتتادى. جىل سايىن ءداستۇرلى تۇردە ءوتىپ كەلە جاتقان «ۋنيۆەرسيتەت ارۋى» بايقاۋىن ۇيىمداستىرۋشى «ءىس – تاجىربيە جانە جۇمىسقا ورنالاستىرۋ» ءبولىمىنىڭ باستىعى، ۋنيۆەرسيتەت پروفەسسورى حاديشا ادىلبەكوۆا بۇل سايىستىڭ بيىل ۋنيۆەرسيتەتتە ءداستۇرلى 12 – رەت ءوتىلىپ وتىرعاندىعىن ايتا وتىرىپ، سايىسقا قاتىسۋشى قىزداردى جەڭىستەرىمەن قۇتتىقتادى. تاربيە ءىسى جونىندەگى پرورەكتور امانعالييەۆا سىمبات تلەگەن قىزى حاديشا اپايعا ريزاشىلىعىن ءبىلدىرىپ، دەنىنە ساۋلىق، وتباسىنا اماندىق تىلەدى.

ستۋدەنتتىك شاقتىڭ ۇمىتىلماس كەزەڭدەرىنىڭ ءبىرى - جاتاقحاناداعى قىزىقتار مەن ۋنيۆەرسيتەت ىشىندە وتىلەتىن كونكۋرستار ەكەنى داۋسىز. «ۋنيۆەرسيتەت ارۋى» بايقاۋى سول ۇمىتىلماس ستۋدەنتتىك شاقتىڭ ءبىر كورىنىسى. جىل سايىن وتسە دە ءوز ماڭىزىن جوعالتپايتىن ءىس-شارا ەكەنىنە بيىل دا كوز جەتكىزدىك. تاربيەسى مەن ءتالىمى بار، حالقىمىزدىڭ سالت – ءداستۇرىن دارىپتەيتىن «ۋنيۆەرسيتەت ارۋى» سايىسىن ۇيىمداستىرۋشى ادىلبەكوۆا حاديشا اپايىمىزعا ايتار العىسىمىز شەكسىز.

الماس نايمانبايەۆ،

ۋنيۆەرسيتەت اعا وقىتۋشىسى، ف.ع.م.