تارازدا تاپا تال تۇستە وق اتىلدى. كاسىپكەردىڭ ۇيىنەن شىعۋىن اڭدىپ تۇرعان ەكى ازامات ەگدە جاستاعى ايەل ادامدى ەسىك الدىندا قىلقىندىرىپ، قولىنداعى سومكەسىن الا قاشادى. سۇمدىق جاعدايدى جولاي ءوتىپ بارا جاتقان كولىكتەگى جولاۋشى بايقاپ قالىپ، قۋا جونەلگەن. الايدا ۇرىنىڭ بىرەۋى تاپانشادان وق جاۋدىرىپ، كۋاگەردەن قۇتىلماق بولعان، - دەپ حابارلايدى Qamshy.kz 31-ارناعا سىلتەمە جاساپ.

بۇل شىتىرمان كينوداعى اتىس-  شابىس ەمەس. كۇنى كەشە تاراز قالاسى اسانباي اسقاروۆ كوشەسىندە تاپا تال تۇستە بولعان جايت. جاقىن ماڭداعى دۇكەننىڭ بەينەكامەراسىنا تۇسكەن بۇل كورىنىستە ۇرىنىڭ ءبىرى وزدەرىن قۋا جونەلگەن جىگىتكە بىرنەشە مارتە وق جاۋدىرعانى انىق اڭعارىلادى. تاپانشادان اتىلعان وق 22 جاستاعى ازاماتتىڭ سانىنا ءتيىپ، الدىڭعى بۇلشىق ەتىن جۇلىپ ءبىراق شىققان. جارالانعان جىگىت ەت قىزۋمەن العاش جاراقاتىن بايقاماعانىن ايتادى.

جاندوس توقتاسىن، تۇرعىن:

- شامامەن 3-4 رەت اتىلدى. ءبىراق ساناعان جوقپىن. ونداي كەزدە ەشكىم سانامايدى دەپ ويلايمىن. ءسويتىپ قۋالاي باستادىق. سومەن تاپانشا اتىلىپ جاتقان سوڭ ءسال - ءپال باستى بۇعىپ، قاشىپ قۋالاپ ەدىم. سول ساتتە پاترۋلدىك ماشينا قۋدى. كەيىن قاراسام اياعىمنان قان كەتىپ جاتىر ەكەن.

بەلگىلى بولعانداي كولىكپەن ءوتىپ بارا جاتقان جاندوس ەكى ازاماتتىڭ كەلىنشەكتى ۇرىپ، قول سومكەسىن تارتىپ العانىن كورەدى. بىردەن باسىن بايگىگە تىگىپ، بۇزاقىلاردى قۋا جونەلەدى. ابىروي بولعاندا ءتارتىپ ساقشىلارى جەدەل جەتىپ، امان قالىپتى. 

ءومىرجان نۇرالييەۆ، جپپ باتالونىنىڭ پوليسەيى:

- قىزمەت بارىسىندا ءۇش ازاماتتىڭ قاراما-قارسى بەتپەن جۇگىرىپ كەلە جاتقانىن بايقادىق. ەڭ ارتىندا  بەتپەردە، قولىندا تاپانشاسى بولدى. اسقاروۆ كوشەسىنەن ميچۋرين كوشەسىنە بۇرىلا تاپانشاسى بار ازامات ەكى رەت قولدانىپ، ورتاداعى جۇگىرگەن ازاماتتىڭ اياعىنان جارالادى. ول وتىرىپ قالعاندا ءبىز كوپكە سوزباي كۇدىكتىنى قۇرىقتادىق.

وسىلايشا ون مينۋتتىڭ ىشىندە كۇدىكتىنىڭ ءبىرى قولعا تۇسەدى. ەكىنشىسى جاقىن ماڭداعى ارىق ىشىندە جاسىرىنىپ جاتقان جەرىندە ۇستالدى. ولار وسى ۇيدە تۇراتىن كاسىپكەردى ءبىر اي بويى اڭدىپ ءجۇرىپتى. بەيتانىس جىگىتتەردىڭ بۇل ماڭدى اينالشىقتاپ جۇرگەنىن كورشىلەرى دە، كاسىپكەردىڭ ءوزى دە بايقاپتى.

سارا باينازاروۆا، زارداپ شەگۋشى:

- ءدال مىنا جەردە وتىردى. نە ىستەپ وتىرعان بالالارسىڭدار دەدىم. مەن ونداي كۇتكەن جوقپىن. جاعامنان الا كەتىپ، موينىمنان قىلقىندىرادى دەپ. مەن ولاردان جاقسى ءسوز كۇتتىم. ۇرىپ-سوعىپ، پيستولەت تاقاعاندا مەن مىندا قۇلادىم.

ءقازىر زارداپ شەككەن سارا ءتارتىپ ساقشىلارىنا العىستان باسقا ايتارى جوق. ءوزى ءۇشىن وققا ۇشقان ازاماتتى بەيبىت كۇننىڭ باتىرىنا بالايدى. ايتا كەتەيىك قولدى بولعان سومكەدە ەكى جارىم ميلليون تەڭگە بولىپتى. ال ونى تارتىپ العاندار تاراز قالاسىنىڭ 1994 جىلعى   تۋمالارى ەكەنى انىقتالدى. ءقازىر ولار ۋاقىتشا قاماۋ اباقتىسىندا.