«جەر انانى قورعامايتىن قورقاق ەكەن مىناۋ!» دەسەڭىزدەر دە وزدەرىڭىز بىلىڭىزدەر. ال، «نەگە؟» دەپ سۇراساڭىزدار جاۋاپ بەرەيىن.
ماسەلە بالا-شاعادا، جۇمىستا ەمەس. قايدان بولسىن ەكى قولعا ءبىر كۇرەك تابىلادى. بالا-شاعانى اسىرارمىز. ماسەلە – ەلدىڭ تىنىشتىعىندا.
وسىدان ەكى جىل بۇرىن «رەسەي زىمىراندارىن سارىشاعانعا اتۋدى توقتاتسىن، قازاق جەرىن ۋلاماسىن، سىناق الاڭى (پوليگون) رەتىندە جالعا بەرىلمەسىن!» ، - دەگەن مازمۇندا سويلەپ، دوسىمنان كەيىن ەرتەڭىندە الاڭعا جالعىز ءوزىم شىققانمىن. ونداعى ماقساتىم ەلدى ويلاۋ بولعانىمەن، شىن مانىندە ار جاعىندا، جۇرەك تۇكپىرىندە ءوزىمدى ويلاپ ەدىم. ءوزىمنىڭ ارىمدى ويلادىم. مەنىڭ تالابىمنان ناتيجە شىقپايتىنىن سەزسەم دە شىققان سەبەبىم ازاماتتىق پارىزىمدى وتەۋ ەدى. پارىزىمدى وتەدىم. ءتۇن ۇيقىم تىنىش بولدى. «ەل الدىندا ارىم تازا» دەپ وزىمە ىشتەي باسۋ ايتىپ جۇرەمىن.
ايتپاقشى، بيىل ءبىراز جەردى رەسەيدەن مەملەكەت قايتارىپ الدى. گۋگلدان ىزدەسەڭىزدەر، جاريالانعان دەرەكتى ماقالالاردى تاباسىزدار. بۇل مەنىڭ ەمەس، مەملەكەتتىك ساياساتتىڭ جەڭىسى. جەردى بىردەن ءبارىن قايتارىپ الۋ مۇمكىن ەمەس ەكەنىن ساۋاتتى ساياساتكەرلەر بىلەدى. ايتەۋىر بىرتىندەپ قايتارامىز.
2013 جىلدىڭ 2-شىلدەسىندە پروتون قۇلاعان كەزدە دە رەسەي ەلشىلىگىنىڭ الدىندا ءبىر توپ جىگىت گەپتيلدىڭ زياندىعىن ايتىپ، نارازىلىق اكسياسىن وتكىزدىك. ەندى جىگىتتەردىڭ حالىق الدىندا ارى تازا. ەندى ولار بورىشكەر ەمەس.
رەسەيدە «ۆوستوچنىي» عارىش ايلاعى تولىق سالىنىپ ءبىتتى. زىمىراندارىن اۋەگە وزدەرى ۇشىرا باستادى. بايقوڭىردان بىرتىندەپ كەتەدى. ۋاقىت ءبارىن ءوز ورنىنا قويادى ەكەن.
ۋاقىت دەمەكشى، «ءۇش تۇعىرلى ءتىل» دە ۋاقىتشا نارسە. ستاتيستيكانى قاراپ شىقتىم. سولتۇستىك وڭىرلەردە قارادومالاقتاردىڭ تۋۋ كورسەتكىشى قاۋىپتەنىپ وتىرعان جاقپەن سالىستىرعاندا اناعۇرلىم، بىرنەشە ەسە كوپ. ال، ءبىز قورقىپ وتىرعان ورىس ءتىلدى كەمپىر-شالداردىڭ ورتاشا جاسى – 60. سوندىقتان، الاڭ بولماڭىزدار. تابيعي تۇردە كەتەدى ولار. ءبىردى ايتىپ بىرگە كەتپەي، ميتينگى ماسەلەسىنە ورالايىن. ونىڭ ءبارىن تىزبەكتەپ وتىرعان سەبەبىم، ميتينگىگە شىقتىم دەپ ماقتانۋ ەمەس، پايداسى مەن زالالىن ناقتى مىسال عىپ كورسەتۋ.
پايداسى اتىراۋدا بەيبىت ميتينگتىڭ بولۋى. اكىمنىڭ حالىقپەن تىلدەسۋى. مىنە، وسى جەتەدى. حالىق ءوزىنىڭ وراسان زور كۇش ەكەنىن كورسەتتى. بيلىك تە بىردەن ەسىن جيدى. ويتكەنى، دۇنيە-بايلىق كەز كەلگەن پەندەنى شالىقتاتىپ جىبەرەدى. پەرىشتە كوكتە عانا. ۇكىمەت اتىراۋدان ساباق الدى. الماتى اكىمدىگى بەلسەندى ازاماتتارمەن ديالوگ ورناتا باستادى. ءبىر بىرىمەن اقىلداسىپ، پىكىر الىسۋى ءۇشىن دوڭگەلەك ۇستەل ۇيىمداستىرماقشى. قازاق بۇرىن سولاي شەشكەن جوق پا ەدى؟! اقساقالدار القاسى مەن اعالار كەڭەسى ءبىر شەشىمگە كەلەتىنىنە ءۇمىتىم زور.
جاڭگىر مەن ماحامبەتتىڭ تىرەسىنەن كىم ۇتتى؟ ۇرپاقتارى رەسەيگە بودان بولدى دا قالدى.
الماتى ۇلكەن شاھار. زيالىلاردىڭ دەنى وسىندا. ءبارى سابىر ساقتاپ وتىر. ولار اقىماق ەمەس. الماتىدا ميتينگ بولسا، ونىڭ بەيبىت بولاتىنىنا سەنىمدى ەمەسپىن. ارانداتۋشىلار مىندەتتى تۇردە پايدا بولادى. وسىنداي جاعداي بولىپ جاتقاندا ۋكراينا قىرىمنان ايىرىلعانىن ۇمىتپايىق. ءقازىر قايتارا الماي الەك. ال ءبىز ميتينگىگە شىقپاس بۇرىن جاس بوزداقتاردىڭ كەلەشەگى مەن دەنساۋلىعىن ويلايىق. پەتروپاۆلدى جادىمىزدان شىعارمايىق.
باستىسى، استىن سىزىپ تۇرىپ ايتايىن، ەڭ باستىسى، حالىق پەن بيلىك اراسىندا ديالوگ پايدا بولدى. جاقىنداسا باستادى. دانەكەر بولىپ، حالىق پەن بيلىكتەن ۇنەمى سۇقبات الىپ جۇرگەندىكتەن ىشتەگى ويىمدى جازۋ – جۋرناليستىك پارىزىم. ەكەۋارا باستالعان ادەمى ديالوگتىڭ شىرقى بۇزىلماسا ەكەن. اتىراۋدان ساباق العان دەپۋتاتتار دەرەۋ ەل ارالاپ، حالىق پەن ەگىستىك القابىنداعى شارۋالارمەن كەزدەسسە ەكەن.
وسىنداي ۇمىتپەن، ەل تىنىشتىعى جانە مەملەكەت ءبىرتۇتاستىعى ءۇشىن ميتينگىگە شىقپايمىن!
جۋرناليست
