داريعا نازاربايەۆا ۇكىمەت جانىنان ساll-ورتالىق قۇراتىن بولدى. كەشە پرەمەر-مينيستر كارىم ءماسىموۆتىڭ جەتەكشىلىگىمەن وتكەن ۇكىمەت وتىرىسىندا وعان وسىنداي تاپسىرما جۇكتەلدى، - دەپ حابارلايدى Qamshy.kz.
ۇكىمەت باسشىسى جەر ماسەلەسىنە قاتىستى ءبىرقاتار تاپسىرمالار قويعان. اتاپ ايتقاندا، ۆيسە-پرەمەر داريعا نازاربايەۆا ۇكىمەت جانىنان جەر رەفورمالارىن ءتۇسىندىرۋ بويىنشا ءبىرىڭعاي ساll-ورتالىق قۇرۋ تۋرالى ۇسىنىس ەنگىزۋگە مىندەتتەلدى.
«جاۋاپتى تۇلعالاردى بەكىتىپ، بىردە-بىر سۇراقتىڭ جاۋاپسىز قالماۋىن قاراستىرۋ كەرەك. ءاربىر باسشى ءوز وكىلەتتىگى شەگىندە قوعامداعى رەفورمالارعا قاتىستى احۋالدى تالداپ، ءوز قىزمەتتەرىنە ءتيىستى وزگەرتۋلەر ەنگىزۋلەرى قاجەت»، - دەيدى ك. ءماسىموۆ.
پرەمەر-مينسيتر ورتالىق جانە جەرگىلىكتى اتقارۋشى ورگاندارعا مەملەكەت باسشىسى جاريالاعان موراتورييدان شىعاتىن، قىسقا مەرزىم ىشىندە ءبىرىنشى ۆيسە-پرەمەر باقىتجان ساعىنتايەۆ باسقاراتىن كوميسسيانىڭ ءتيىمدى جۇمىسىنا قاجەت شارالاردى قابىلداۋدى تاپسىردى.
وسى جيىندا الداعى ۋاقىتتا جەر قاتىناستارى ماسەلەلەرى ۇلتتىق ەكونوميكا مينيسترلىگىنىڭ قاراۋىنان الىنىپ، اۋىلشارۋاشىلىق مينيسترلىگىنىڭ قۇزىرىنا وتەتىنى ايتىلدى.
سونداي-اق، دەنساۋلىق ساقتاۋ جانە الەۋمەتتىك دامۋ مينيسترلىگى مىندەتتى مەديسينالىق ساقتاندىرۋ، ءبىلىم جانە عىلىم مينيسترلىگى ءۇش ءتىلدى وقىتۋ مەن دەمالىس مەرزىمىن ۇزارتۋعا قاتىستى قوعامدىق پىكىردى زەرتتەۋ بويىنشا تاپسىرمالار الدى.
ەستەرىڭىزگە سالساق، پرەزيدەنت ن. نازاربايەۆ «جەر كودەكسىنە» ەنگەن ءبىرقاتار وزگەرىستەرگە جىل سوڭىنا دەيىن موراتوريي جاريالاپ، جىل سوڭىنا دەيىن حالىققا ءتۇسىندىرۋ جۇمىستارىن جۇرگىزۋدى تاپسىرعان بولاتىن.
