بۇگىن تۇندە ورتكە ورانعان الماتىداعى «يۋبيلەينىي» دۇكەنى مەن ونىڭ ۇستىندەگى تۇرعىن ۇيگە قالا باسشىسى باۋىرجان بايبەكتىڭ ارنايى بارىپ، ونداعى جاعدايمەن تانىسقانىن، زارداپ شەككەن تۇرعىندارمەن كەزدەسكەنىن اقپارات قۇرالدارى جارىسا جازۋدا. قالا باسشىسىنىڭ ءتىلسىز جاۋدان زارداپ شەككەن تۇرعىنداردىڭ احۋالىنا ەنىپ، قامقورلىق تانىتۋى قۇپتارلىق جاي، ارينە. الايدا، ورتكە سەبەپ بولعان نىساننىڭ ەڭ الدىمەن جەكە مەنشىكتەگى ساۋدا ءۇيى ەكەندىگىن ەسكەرسەك، ول ويىڭىزدان دا دەرەۋ اينىپ قالاسىز.
الماتى جۇرتشىلىعىن ءتىلسىز جاۋمەن قاتار، سۋ تاسقىنى دا از الاڭداتىپ وتىرعان جوق. بىلتىردان بەرى قار سۋى دا، جاۋىن-شاشىن دا الماتىلىقتار ءۇشىن وڭايعا سوقپاي وتىر. ءساۋىر ايىنىڭ سوڭىندا الماتىداعى بىرنەشە وزەن تولاسسىز جاۋعان جاڭبىردان ارناسىنان اسىپ، قالانىڭ تومەن جاعىندا ورنالاسقان بىرنەشە ەلدى مەكەندەگى ۇيلەردى سۋ باستى. بۇگىن تۇندە جاۋعان جاڭبىر سالدارىنان دا سول جاعداي قايتالانىپ وتىر. قارعالى، ەسەنتاي، اقساي، ۇلكەن الماتى سىندى وزەندەرگە جاقىن ورنالاسقان اۋدانداردىڭ تۇرعىندارى قورقىنىش قۇرساۋىندا قالىپ وتىر.
ءار وڭىردەن الماتىعا اعىلعان تالاي قازاق وتباسى پانالاپ وتىرعان «شاڭىراق» ىقشام اۋدانىندا دا جاعداي قيىنداپ وتىر. مۇنداعى كوشەلەر مەن جەر ۇيلەردىڭ اۋلالارىنا دەيىن سۋ استىندا قالعان. بۇل تۋرالى «فەيسبۋك» جەلىسىندە حالەلحان يبرايىمحان ۇلى اتتى تۇرعىن دابىل قاقتى.
«جولدىڭ بارلىعىن پوليسيا جاپقان. ساي-سالانى تۇگەل سۋ باسقان. وسى سايدىڭ بارلىعىندا وتىرعاندار – ءبىزدىڭ قارا كوز قازاقتار. سوندىقتا، وسىنداي ساي-سالانى پانالاپ وتىرعان قازاقتارعا ءۇي سالۋ ءۇشىن جازىق جەرلەردەن ون سوتىقتان جەر بەرىلسىن»، - دەيدى ول.
«شاڭىراق» تۇرعىندارىنىڭ بۇل زارىنا قالا باسشىلىعى قاشان قۇلاق اساتىنى بەلگىسىز. ازىرگە، اكىم باستاعان شەنەۋنىكتەر «يۋبيلەينىيدىڭ» ۇيلەرى ءۇشىن عانا الاڭداپ ءجۇر.
