ءاندىجانداعى مەشىت قىزمەتكەرلەرى ءپىتىر-ساداقادان جانە ءدىني باسىلىمداردى جازدىرۋدان تۇسكەن 173 ميلليون سۋمدى (27 مىڭ دوللار) تالان-تاراجعا سالدى دەپ ايىپتالۋدا. سوڭعى بىرنەشە جىلداعى قارجىلىق تالان-تاراجدى بۋحگالتەرلىك تەكسەرۋ انىقتاعان، - دەپ حابارلايدى Qamshy.kz centralasian.org-كە سىلتەمە جاساپ.

«حوليد يبن ۆاليد» مەشىتىنىڭ قىزمەتكەرلەرى كەلۋشىلەردەن «حيدويات» («اقيقات جولى») جانە «يسلوم نۋري» («يسلام نۇرى») باسىلىمدارىنا جازىلۋدى سۇراعان جانە اقشانى قولما-قول وزدەرى جيناعان. ودان بولەك، مەشىتكە كەلۋشىلەردەن زەكەت پەن پىتىرگە اقشا العان.

تەكسەرۋشىلەردىڭ ءبىرىنىڭ ايتۋىنشا، تۇبىرتەكتەر جازىلىپ وتىرعانىمەن، 173 ميلليون سۋم بۋحگالتەرلىك داپتەرگە جازىلماعان جانە بانكتەگى ەسەپشوتقا تۇسپەگەن. مەشىت قىزمەتكەرلەرى اقشانى مەشىت عيماراتىن جوندەۋگە جۇمساعاندارىن ايتۋدا. جانە تۇسكەن اقشا بويىنشا قۇجات تولتىرماعان بۇرىنعى بۋحگالتەردى كىنالايدى.

كەي دەرەك بوينىشا، مەشىتكە تۇسەتىن قارجىنىڭ جىلدىق كولەمى 100 ميلليون سۋمنان (شامامەن 15،5 مىڭاقش دوللارى) اسادى. جەرگىلىكتى تۇرعىندار مەشىت يمامىنان اقشانىڭ راسىمەن دە جوندەۋگە جۇمسالعانىن دالەلدەۋدى تالاپ ەتۋدە.

– اقشانىڭ ەشقانداي جوندەۋگە جۇمسالماعانى اقىماق جانعا دا تۇسىنىكتى. ولاي بولعان جاعدايدا، كەلۋشىلەرگە جۇما نامازى كەزىندە ءبىر اۋىز ايتار ەدى. قارجىنى قالتاسىنا باسقاندار جاۋاپقا تارتىلۋى كەرەك، – دەيدى نامازحانداردىڭ ءبىرى.