"ءۇش ءتىلدى وقىتۋ" تاعى سىنعا ۇشىرادى. بۇگىن ءبىر توپ زيالى قاۋىم ءبىلىم جانە عىلىم مينيسترلىگىنىڭ باستاماسىنا قارسى شىعىپ، پرەزيدەنتكە تاعى ءبىر اشىق حات جولدادى، - دەپ حابارلايدى Qamshy.kz 31 ارناعا سىلتەمە جاساپ. 

جالپى ءبىلىمدى وزگە تىلدە وقۋ بالالاردىڭ ساۋاتسىزدىعىنا اكەلەدى دەگەن بەلسەندىلەر،  اعىلشىن ءتىلىنىڭ ساعاتىن ارتتىرسىن دەگەن بالاما ۇسىنىپ وتىر. سونداي-اق زيالى قاۋىم بۇگىن عانا وفشوردان شوتى تابىلعان ەرلان ساعادييەۆتى پرەزيدەنت ايتسا دا، ءالى كۇنگە دەيىن بىزبەن اقىلداسۋعا اسىقپايدى دەپ ايىپتادى.  

استاناداعى عىلىم مەن شىعارماشىلىق سالاسىنداعى زيالىلاردىڭ ءبىر توبى بۇگىن اشىق حاتتارىن گازەت پەن ينتەرنەتكە عانا جاريالايتىن ءداستۇردى بۇزىپ، اقورداعا وزدەرى الىپ كەلدى. باستى تالاپ: ونسىز دا قازاق ءتىلىنىڭ دامۋى كەشەۋىلدەپ تۇرعان شاقتا جاس ۇرپاقتى تاعى دا تاجىريبە وبەكتىسىنە اينالدىرماۋ.

"نەگە ۇنەمى بىزگە، قازاق حالقىنا تاجىريبە جاساي بەرەدى. 70 جىل سوۆەت وداعىندا ۇنەمى بىزگە ەكسپەريمەنت جاسالدى، بۇل توقتامايدى ما؟ 25 جىل ىشىندە ءبىز بالالارىمىزدى قازاق قىلا المادىق. ەندى ورىس قىلامىز با، اعىلشىن قىلامىز با؟ اقىلسىزدىق. سوندىقتان بىزبەن نەگە ساناسپايدى؟" ، - دەيدى "مەملەكەتتىك ءتىل" قوعامدىق ۇيىمىنىڭ وكىلى جۇمامۇرات ءشامشى.

نەگىزگى ءبىلىمدى باسقا تىلدە وقىتۋ بالالاردى ساۋاتسىزدىققا ۇرىندىرادى» دەيدى نارازى توپ. ونسىز دا بازالىق پاندەردى اعىلشىن تىلىندە وقىتاتىن مامان تاپشى، ونى تۇسىنەتىن دە وقۋشى جوق. سوندىقتان زيالى قاۋىم ونىڭ ورنىنا اعىلشىن ءتىلىنىڭ ساعاتىن ارتتىرىپ، كۋرستاردى مىندەتتەۋدى ۇسىندى. 

"مالايزيا، سينگاپۋر، فيليپپين ەلدەرىنىڭ جۇيەسىن كوشىرىپ وتىرعان سياقتىمىز. ءبىراق ولار قايدان شىقتى، ءبىز قايدان شىققانىمىزدى ەستە ۇستاۋ كەرەك. ال ءبىز بودان بولعاندا تىلىمىزدەن، سالتىمىزدان ايىردى. ەندى تاۋەلسىزدىك جىلدارى قايتا مەملەكەتتىك ءتىلدى دامىتىپ جاتقان كەزدە تۇتقيىلدان ءۇشتۇعىرلى ءتىلدى جۇزەگە اسىرامىز دەۋ قايتا قالىپتاسىپ كەلە جاتقان مەملەكەتتىك ءتىلدى جويىپ الۋى مۇمكىن" ، - دەيدى ق ر مادەنيەت قايراتكەرى قۋاندىق شاماحاي ۇلى.  

ەڭبەك، سۋرەت، مۋزىكا پاندەرىنەن ءبىر ءمۇعالىم بەرىپ، «امبەباپ ۇستاز» جاساماقشى مينيستر باستاماسىنان دا بەلسەندىلەر شوشىپ وتىر. مينيستر ساعادييەۆتىڭ ءوزى "زيالىلاردىڭ بالالارى شەتەلدە اعىلشىنشا ءبىلىم الادى. قاراپايىم حالىقتىڭ بالاسى نەگە سولار سياقتى اعىلشىنشا وقىماسقا؟" دەپ، ولاردىڭ العاشقى حاتىنا قىسقاشا جاۋاپ ايتقان ەدى. ال دەپۋتاتتار ءمينيستردىڭ رەفورماسىن قولداعانىمەن، ونىڭ مەرزىمى جونىنەن زيالىلار پىكىرىمەن كەلىسەتىندەي.

"قانداي جۇمىستى بۇرىنعى ريەۆوليۋسيالىق ادىسپەن ەمەس، كوكەيگە قونىمدى ەۆوليۋسيالىق جولمەن ءجۇرۋ كەرەك. ءبىز حالقىمىزدىڭ ءۇشتىلدى بولۋىن قولدايمىز. ول جۇمىستىڭ نەگىزى مەكتەپ قابىرعاسىندا قالانۋى كەرەكتىگىن قولدايمىز. مەرزىمى جونىندە كوپ ويلانۋ كەرەك، اسىعىستىققا بارماۋ كەرەك" دەگەن وي ايتتى ق ر پارلامەنتى ءماجىلىسىنىڭ دەپۋتاتى ساۋىتبەك ءابدىراحمانوۆ.

دەپۋتات ءمۇعالىم اعىلشىنشا ساباق بەرە الۋ دەڭگەيىنە جەتكەندە، وقۋشى شەت تىلىندەگى ءدارىستى تۇسىنە الاتىن كەزدە عانا رەفورما جايىندا ءسوز قوزعاۋ كەرەك دەيدى. ال كۇنى كەشە ايماقتاردى ارالاپ «ماڭگىلىك ەلدى» ءتۇسىندىرىپ كەلگەن ماجىلىسۆۋمەن ايگۇل نۇركينا جاڭا رەفورمالاردى ۇعىندىرۋ ءۇشىن ەلدى-مەكەندەرگە قايتا شىعۋعا قارسى ەمەس ەكەن.

"سۇحبات بەرۋ بىلاي تۇرسىن، اۋىل-ايماقتى ارالىپ حالىقپەن كەزدەسۋ ءتىپتى باسقا. مينيستر، دەپۋتاتتار حالىق ءىشىن ارالاپ، سۇراقتارىنا جاۋاپ بەرىپ، اتا-انالاردىڭ ۇسىنىستارىن ەستىپ قايتۋى ءتيىس" ەكەندىگىن العا تارتتى ق ر پارلامەنتى ءماجىلىسىنىڭ دەپۋتاتى ايگۇل نۇركينا.

حاتتى پرەزيدەنتكە جولداعان توپ ساعادييەۆكە سىن ايتتى. زيالى قاۋىم پرەزيدەنت قانشا ايتسا دا، مينيستر "بىزبەن اقىلداسۋعا تىرىسپادى، حابارلاسپادى" دەپ رەنجۋلى.