قىتايدان كەلگەن قازاقتار قاعازباستىلىقتىڭ قۇربانى بولۋدا، - دەپ حابارلايدى Qamshy.kz 31-ارناعا سىلتەمە جاساپ.

الماتىدا قىتايدان كەلگەن ءبىر توپ ەتنيكالىق قازاق قۇجات راسىمدەۋدىڭ قيىندىعىن ايتىپ، ازاماتتىق الۋدىڭ ازابى قاجىتقانىنا نارازى. جۇڭگو تاراپىنان مۇلدە بەرىلمەيتىن انىقتامانى تالاپ ەتەتىن رەسمي ورىندار كوشىپ كەلەتىن قانداستاردىڭ جولىن بوگەپ تۇر دەيدى. ءتىپتى، قۇجات ماسەلەسى رەتتەلمەي قازاقستانعا كەلگەندەردىڭ ءبىرازى قىتايعا قايتا كوشىپ كەتىپتى. ال ەل ۇكىمەتى ازاماتتىق الۋ جايىن ءالى دە ءبىرجاقتى رەتتەۋگە اسىعار ەمەس.

جيىلعانداردىڭ قيىندىعى ورتاق، جانايقايى ءبىر - قۇجات راسىمدەۋ اۋرەلەگەن. ءتىپتى، قازاقستانعا كەلگەنىنە بىرنەشە جىل بولسا دا ازاماتتىق الا الماي سەندەلگەن جۇرت رەسمي ورىنداردىڭ جوق قۇجاتتاردى تالاپ ەتەتىنىن تۇسىنبەي دال. ايتۋلارىنشا، ورالمان كۋالىگىن الۋدىڭ ءوزى قيىنداعان. ال ازاماتتىق الۋ ءۇشىن قاجەتتى سوتتالماعانىن راستايتىن انىقتاما قىتايدا بەرىلمەيدى ەكەن.

سايرانگۇل ەرەجەپباي قىزى، ورالمان:

- ءبىر جىلدىق ۆيزامەن كەلىپ، ءجۇردىم وسى جاقتا. ءتورت جىل ءجۇرىپ قويدىم وسىلاي. ەندى ىحتيار حات تاپسىرايىن دەسەم، سوتتالماعان قاعاز الىپ كەل دەيدى. سوتتالعان ادام قازاقستانعا كەلمەيدى عوي. ونىڭ ۇستىنە ونى بەرمەيدى قىتايدا.    

امالىن تاۋىپ الىپ كەلگەن انىقتامانى جارامسىز دەپ كەرى قايتارادى دەيدى جينالعاندار. جۇڭگو استاناسىنان باسىلاتىن ءموردى تالاپ ەتەدى ەكەن. ال كوپ شىعىنمەن، ءبىراز تەر توگىپ الدىرعان "سوتتالمادى" دەگەن انىقتامانى مەرزىمى ءوتىپ كەتتى دەپ تاعى قابىلدامايدى. اتاجۇرتقا ورالعىسى كەلەتىن قانداستاردىڭ جولىن بوگەپ تۇرعان انىقتامانى قايتا قاراۋ تۋرالى ۇكىمەتكە ۇسىنىس ايتىلعان. الايدا وزگەرىس بولمادى. كەدەرگىلەردى جويىپ، قانداستاردىڭ كوشى-قون جايىن رەتتەۋگە ات سالىسىپ جۇرگەن بەلسەندى اۋىت مۇقيبەك ماسەلە شەشىلمەسە ۇكىمەتتى سوتقا بەرەمىن دەيدى.

اۋىت مۇقيبەك، اقىن:

- بۇل ماسەلەنى شەشۋدىڭ ءبىر-اق جولى بار. ول - ۇكىمەتتى سوتقا بەرىپ، سوت ارقىلى عانا دالەلدەپ شەشۋ. وعان مەنىڭ قولىمدا قۇجاتتار جەتەدى. جۇڭگو حالىق رەسپۋبليكاسىنىڭ بەرگەن جاۋاپتارى بار، سىرتقى ىستەر مينيسترلىگى ارقىلى جانە باسقا دا دالەلدى قۇجاتتار كوپ. 

قىتايدان كەلىپ، اتاجۇرتقا تابان تىرەگىسى كەلگەن قالىڭ جۇرتتىڭ مۇڭىنا اينالعان قۇجات اۋرەسى كوشتىڭ باسىن قازاقستانعا بۇرۋعا ۇلكەن توسقاۋىل ەكەن. اتاجۇرتقا كەتتىم دەگەن ءبىر ادام كەرى قايتسا، ءبىر اۋىلعا كەرى اسەرى تيەدى دەيدى قانداستار.