حالىق اراسىندا قاتتى نارازىلىققا ۇشىراعان جەر رەفورماسى مەن ءبىلىم بەرۋ سالاسىنداعى باستامالارعا قاتىستى ءتۇسىندىرۋ جۇمىستارى اسكەريلەر اراسىندا دا جۇرۋدە، - دەپ حابارلايدى Qamshy.kz ق ر ۇلتتىق ۇلانى «وڭتۇستىك» وڭىرلىك قولباسشىلىعىنىڭ باسپا ءسوز قىزمەتىنە سىلتەمە جاساپ.
بۇگىن ۇلتتىق ۇلاننىڭ الماتى قالاسىندا ورنالاسقان «وڭتۇستىك» وڭىرلىك قولباسشىلىعىندا وڭىرلىك قولباسشىلىق قولباسشىسى گەنەرال-مايور الىبەك سەرالييەۆتىڭ باسشىلىعىمەن وڭىرلىك قولباسشىلىق اسكەري بولىمدەرىنىڭ اسكەري قىزمەتشىلەرىنە ەلىمىزدە ءبىراز داۋ تۋدىرعان جەر كودەكسىنە جانە ءبىلىم بەرۋ مەن دەنساۋلىق ساقتاۋ سالاسىنا وزگەرىستەر ەنگىزۋ تۋرالى باستامالاردى تۇسىندىرۋگە ارنالعان كەزدەسۋ ءوتتى.
مەملەكەت باسشىسى، قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازاربايەۆتىڭ بۇل جۇمىستار اياسىندا قابىلدانۋى ءتيىس جاڭا نورمالاردىڭ، ءبىلىم بەرۋ مەن دەنساۋلىق ساقتاۋ سالاسىنداعى وزگەرىستەردىڭ حالىققا دۇرىس جەتكىزىلمەگەندىگىن، دۇرىس تالقىلانباعاندىعىن ەسكەرگەن الىبەك بولات ۇلى جەكە قۇرامعا جاڭا نورمالاردى كەڭىنەن تانىستىرىپ، تالقىعا سالدى. ول ءوز سوزىندە:
«قازىرگى نارىقتىق قوعامدا ارانداتۋشىلىققا جول بەرىلمەۋى كەرەك، ەلباسىمىزدىڭ جۇرگىزىپ وتىرعان سارالى ساياساتى مەملەكەتىمىزدىڭ بولاشاعى ءۇشىن ماڭىزدى ەكەنىن ۇمىتپايىق. پرەزيدەنتىمىز ۇسىنعان بەس ينستيتۋسيونالدى رەفورمالاردىڭ جۇزەگە اسۋى، بۇل – تۇراقتىلىق پەن جاسامپازدىقتىڭ كەپىلى»، - دەي كەلە، اسكەري قىزمەتشىلەرگە، وسى ماسەلەلەردى وتباسى مۇشەلەرىنە دۇرىس ءتۇسىندىرۋدى تاپسىردى. بۇنىمەن قوسا قولباسشى اعىمداعى جىلدىڭ 26 ساۋىرىندە وتكەن قازاقستان حالىقتارى اسسامبلەياسىنىڭ «تاۋەلسىزدىك. كەلىسىم. بولاشاعى ءبىرتۇتاس ۇلت» اتتى 24 سەسسياسىندا قابىلدانعان «ماڭگىلىك ەل» اتتى پاتريوتتىق اكتىسىن اسكەري قىزمەتشىلەرگە بايانداپ، ەلىمىزدىڭ «ماڭگىلىك ەل» دارەجەسىنە جەتۋ جولىنداعى ەلباسى ۇسىنعان اۋقىمدى 7 باعىتتىڭ ءارقايسىسىنا جەكە-جەكە توقتالىپ ءوتتى.
قولباسشىنىڭ تۇسىندىرمە جۇمىستارىنان كەيىن قىزمەتىنە جاقىندا عانا تاعايىندالعان الماتى گارنيزونىنىڭ اسكەري پروكۋرورى، ادىلەت پولكوۆنيگى ساتكەن تىلەكجان وڭىرلىك قولباسشىلىققا ارنايى كەلىپ، جوعارىدا اتالعان ماسەلەلەرگە بايلانىستى ءوزىنىڭ پىكىرىن ءبىلدىردى. ساتكەن باۋىرجان ۇلى اعىمداعى جىلى قابىلدانعان «2016-2018 جىلدارعا ارنالعان قازاقستان قارۋلى كۇشتەرى، باسقا دا اسكەرلەرى مەن اسكەري قۇرالىمدارىنداعى قۇقىق بۇزۋشىلىقتىڭ الدىن الۋ» تۋرالى جاڭا باعدارلامانى جۇزەگە اسىرۋ بويىنشا جۇمىستار قولعا الىنعانىن اتاپ ءوتىپ، ناشاقورلىق، كوررۋپسيا، سۋيسيد جانە باسقا دا قىلمىستار تۋرالى ءسوز قوزعادى، سونداي-اق ونىڭ الدىن الۋ تۋرالى پايىمدى مىسالدار كەلتىردى.
قولباسشى مەن اسكەري پروكۋرورعا اسكەري قىزمەتشىلەر دە وزەگىندە جۇرگەن باسپانا الۋ، ءتۇرلى جاردەماقىلار مەن جەڭىلدىكتەر تۋرالى كوكەيلەرىندە جۇرگەن ماسەلەلەردى قوزعاپ، قويعان سۇراقتارىنا ءتيىستى جاۋاپتار الدى.
