الماتىدا نارەستەسىن ساتپاق بولعان ايەل قولعا ءتۇستى، - دەپ حابارلايدى Qamshy.kz الماتى قالالىق ءىىد باسپا ءسوز قىزمەتىنە سىلتەمە جاساپ.

جامبىل وبلىسى مەركى اۋدانىنىڭ 25 جاستاعى تۇرعىنى تۇرمىستىق قيىندىقتاردان شىعۋ ءۇشىن بار-جوعى 1 جاس 3 ايلىق نارەستەسىن ساتپاق بولعان. «ءتىرى تاۋاردى» وتكىزۋ ءۇشىن كومەككە 51 جاستاعى تانىسىن تارتقان. قولايلى ساتىپ الۋشىنى ولار ەكى اپتا بويى ىزدەگەن كورىنەدى.

«بىرنەشە كۇن وتكەن سوڭ ءسابيدى الاتىن ادام دا پايدا بولعان. بالا ساۋدالاۋشىلار نارەستەنى 2 مىڭ اقش دوللارىنا باعالاپتى. بالا ساۋدالاعان ەكى ايەل دە ساتىپ الۋشىداگن اقشا الىپ جاتقان جەرلەرىندە تۇتقىندالدى»، - دەلىنگەن باسپا ءسوز قىزمەتى تاراتقان حابارلامادا.

الماتى قالاسى ءىىد ۇيىمداسقان قىلمىسپەن كۇرەس باسقارماسىنىڭ قىزمەتكەرلەرى ولاردان 670 مىڭ تەڭگە اقشا تاركىلەدى. كەيىن بۇل قاراجاتتىڭ تەك 200 مىڭ تەڭگەسى عانا نارەستەنىڭ اناسىنا قالدىرىلىپ، قالعانىن دەلدالدىق قىزمەت كورسەتكەن كەلىنشەكتىڭ الماق بولعانى انىقتالىپ وتىر.

الماتىلىق پوليسەيلەر ۇستالعان كەلىنشەكتىڭ وسىدان ءبىر كۇن بۇرىن عانا ءسابيىن بەلگىسىز بىرەۋگە ەلۋ مىڭ تەڭگەگە ساتىپ، كەيىن جاڭا ۇسىنىس تۇسكەندە قايتارىپ العانىن دا حابارلاپ وتىر. ءقازىر وسى ءىس بويىنشا ەكى كەلىنشەك تە تەرگەۋ يزولياتورىنا جابىلىپ، سوتۇقا دەيىنگى تەرگەۋ جۇمىستارى باستالعان.