39 جاستاعى چالباسوۆ نۇرلان الماتىلىقتاردى قىمبات كولىك اپەرەمىن دەپ الداپ، 31 ملن تەڭگەسىن قولدى ەتكەن، دەپ حابارلايدى Qamshy.kz قالالىق ءىىد باسپا ءسوز قىزمەتىنە سىلتەمە جاساپ.

بوستاندىق اۋداندىق ءىىب تەرگەۋ ءبولىمى حابارلاعانداي، كۇدىكتى شەتەلدەن قىمبات كولىك تاسۋمەن اينالىساتىن جەكە كاسىپكەرلىك اشقان. ءوزىنىڭ قىزمەتى ءۇشىن ول كولىك قۇنىنىڭ 70 پايىزىن الدىن الا الىپ وتىرعان. وسىلايشا اڭقاۋ تۇرعىنداردان 31 ملن 200 مىڭ تەڭگە جيناپ العان.

«2016 جىلدىڭ اقپانىندا ول قازاقستان-رەسەي شەكاراسىندا ۇستالدى. جالعان قۇجاتپەن شەتەل اسپاق بولعان. ونىڭ كومپانياسى سىرتقى ەكونوميكالىق قاتىناستاردىڭ قاتىسۋشىسى رەتىندە كەدەندىك ورگانداردا تىركەلمەگەنى انىقتالدى. ياعني، ول و باستان كولىك اكەلۋدى ەمەس، ادامداردىڭ سەنىمىنە كىرىپ اقشا تابۋدى ويلاعان. ەگەر ونىڭ ارەكەتىنەن جاپا شەككەن ازاماتتار بولسا، 254-47-62؛ 254-47-02 نومىرلەرىنە حابارلاسۋىن وتىنەمىز»، -  دەدى بوستاندىق اۋداندىق ءىىب تەرگەۋ ءبولىمىنىڭ تەرگەۋشىسى ازامات نۇربولاتوۆ.

ءقازىر كۇدىكتى ءىىد ۋاقىتشا ۇستاۋ وقشاۋلاعىشىندا وتىر. تەرگەۋ امالدارى جالعاسۋدا.