الماتى قالاسى بوستاندىق اۋداندىق سوتىنا قازاقستاندىقتاردى وتانىن ساتتى دەپ ايىپتاعان «ەۋرازيا» ارناسىنىڭ وجايىنى «ەۋرازيا+ورت» جاۋاپكەرشىلىگى شەكتەۋلى سەرىكتەستىگىنىڭ ۇستىنەن شاعىم ءتۇستى، - دەپ حابارلايدى Qamshy.kz.

شاعىمدى اۋداندىق سوتقا زاڭگەر نۇرحان جۇمابەكوۆ تاپسىرعان. شاعىمدانۋشى ارنانى جاۋاپقا تارتىپ، وزىنە مورالدىق شىعىن رەتىندە تەلەارنا باسشىلىعىنان ءجۇز مىڭ تەڭگە ءوندىرىپ بەرۋدى سۇراعان.

ەستەرىڭىزگە سالساق، تەلەارنا جۋرناليستەرى 24 ءساۋىر كۇنى اتىراۋدا، 27 ساۋىردە سەمەي مەن اقتوبە قالالارىندا، ال، 1 مامىردا قىزىلوردادا جەر ساۋداسىنا نارازىلىق ءبىلدىرىپ ميتينگكە شىققان حالىقتى شەتەلدىك توپتاردان 50-150 اقش دوللارى كولەمىندە قارجى الدى دەپ ايىپتاعان بولاتىن. تەلەارنا ۇجىمى بۇعان دالەل رەتىندە بەلگىسىز ازاماتتاردىڭ اقشا تاراتىپ جۇرگەن ۆيدەوسىن دا كورسەتتى. 

زاڭگەر ەل ازاماتتارىن وسى ماسەلەگە بەي-جاي قاراماي، تەلەارنانى جاۋاپقا تارتۋ ءۇشىن كۇرەسۋگە شاقىرعان.