پارلامەنت ماجىلىسىندە وتكەن ۇكىمەت ساعاتىندا ەلدىڭ باس پوليسەيى قالمۇحامبەت قاسىموۆ جەرگىلىكتى پوليسيا قىزمەتىنە قاتىستى بايانداماسىندا تۇرعىنداردىڭ پوليسيا قىزمەتىنە كوڭىلى تولماۋى ورىندى ەكەنىن ايتتى، - دەپ حابارلايدى Qamshy.kz ازاتتىققا سىلتەمە جاساپ.

«قىلمىستىق جاعدايعا بوتەننىڭ مۇلكىن ۇرلاۋ كادىمگىدەي اسەر ەتىپ وتىر. ول قىلمىستىڭ 60 پايىزىن قۇرايدى، ال كەي اۋدانداردا كورسەتكىش ودان دا جوعارى. مۇلىك ۇرلىعىنىڭ كوپشىلىگى جەڭىل جانە ورتا دارەجەدەگى قىلمىستار: ۇيالى تەلەفونداردى ۇرلاۋ، كولىك توناۋ، قالتا ۇرلىعى جانە تاعى باسقا. ءبىراق تۇرعىنداردىڭ كوپشىلىگى وسى قىلمىس تۇرلەرىنەن زارداپ شەگىپ وتىر. ءبىز ءازىر مۇلىك ۇرلىعىمەن كۇرەستە جاعدايدى وزگەرتە الماي وتىرمىز. ازاماتتارىمىزدىڭ پوليسيانىڭ وسى باعىتىنداعى جۇمىسىنا كوڭىلى تولماۋىنىڭ سەبەبى بار»، - دەيدى قالمۇحامبەت قاسىموۆ.

رەسمي دەرەك بويىنشا، جىل باسىنان ىشكى ىستەر ورگاندارىنا 740 مىڭ قۇقىق بۇزۋشىلىق جايىندا ءوتىنىش پەن شاعىم تۇسكەن. ونىڭ 130 مىڭعا جۋىعى قىلمىستىق قۇقىق بۇزۋشىلىق ساناتىنا كىرگەن.

سونىمەن بىرگە، مينيستر بايانداماسىندا سوڭعى جىلدارى ىشكى ىستەر ورگاندارىنىڭ جۇمىسى كوبەيىپ كەتكەنىن ايتادى.

- اسىرەسە، تەرگەۋ جانە انىقتاۋ قىزمەتتەرىنىڭ جاعدايى قيىن. وتكەن جىلدىڭ قورىتىندىسى بويىنشا، ءار تەرگەۋشىگە تۇسەتىن قىزمەتتىك جۇكتەمە 136 قىلمىستىق ىسكە جەتكەن، ال ونىڭ نورماسى 41 بولۋى كەرەك. ءبىر انىقتاۋشىعا تۇسەتىن جۇكتەمە - 253 قىلمىستىق ءىس بولعان، ال ونىڭ نوماسى - 51. سوندىقتان بۇل قىزمەتتەردە شىنىمەن دە قيىندىقتارعا ۇشىراپ وتىرمىز. ولار شتاتتىق تۇرعىدان جانە ماتەريالدى تەحنيكالىق تۇرعىدان كۇشەيتۋگە ءزارۋ، - دەدى قالمۇحامبەت قاسىموۆ.

ءمينيستردىڭ ايتۋىنشا، ىشكى ىستەر ورگاندارى كادرلىق تاپشىلىق تا كورىپ وتىر. ءقازىر ىشكى ىستەر ورگاندارىنىڭ ءتۇرلى قۇرىلىمدارىندا 1500 قىزمەتتىك ورىن بوس تۇرعان كورىنەدى.