"ەر تۋعان جەرىنە" تارتادى. بيىلعى ماۋسىم م.اۋەزوۆ تەاترىنىڭ 90 جىلدىعى قارساڭىندا قاراشاڭىراقتىڭ كيەلى ساحناسىنا 3 بىردەي تەاتر تارلانى قايتا ورالدى.

قازاقستاننىڭ ەڭبەك سىڭىرگەن قايراتكەرلەرى بولات ءابدىلمانوۆ پەن عاني قۇلجانوۆتىڭ ءىزىن الا جانات تىنبايەۆ تا م.اۋەزوۆ تەاترىنىڭ اكتەرلىك قۇرامىنا قابىلداندى.

كورەرمەن قاۋىمنىڭ جۇرەگىن كوگىلدىر ەكران ارقىلى جاۋلاپ العان اكتەر م.اۋەزوۆ تەاترىنا قۇر الاقان كەلگەن جوق. جاڭالىعىن الا كەلدى. ەندى سۇيىكتى اكتەرلەرىڭىزدى ەمير ءبايعازيننىڭ "جارالى پەرىشتە" ("رانەنىي انگەل") كارتيناسىنان تاماشالاي الاسىزدار.  13 مامىر كۇنى "ارمان" كينوتەاترىندا تۇساۋى كەسىلگەن فيلمدە بيولوگيا ءپانى ءمۇعالىمىنىڭ ءرولىن ويناعان اكتەر: "90 جىلدارداعى حالىقتىڭ الەۋمەتتىك، ەكونوميكالىق جاعدايىنداعى وزگەرىستەر ءجاسوسپىرىم، وسكەلەڭ ۇرپاققا كوپ اسەرىن تيگىزدى. ەلىمىزدەگى كەدەرگىلەر مەن كەلەڭسىزدىكتەر جاستاردىڭ قوعامعا بەيىمدەلۋى، ءوسىپ جەتىلۋى، ارماندارىنا جەتۋىنە كەدەرگى جاسادى. اتالعان فيلمدە وسىنداي قيىن-قىستاۋ كەزەڭدەگى كوزدەگەن ماقساتتارىنا، دىتتەگەن ارماندارىنا جەتە الماعان جاستاردىڭ بولاشاعىنا تيگىزگەن زيانى باياندالادى. ءوز باسىم سول ۋاقىتتارداعى قيىنشىلىقتاردى سەزىنىپ، ساناسىندا سارالاي الاتىن كوز اشىق ازاماتتىڭ ءرولىن وينادىم"، - دەيدى.

كورەرمەن قاۋىمعا "قۇرداستار" (رەج. ەرلان جۇمابەك، 2010)،  "عاشىق جۇرەك" (رەج. اسقار ۇزابايەۆ، 2012)، "سانجار مەن قايسار" (رەج. احات يبرايەۆ، 2012-2013)، "ءومىر وتكەلدەرى" (رەج. نارىن ەرلان، 2013)، "كۇن ساقشىلارى" (رەج. سانجار سۇلتانوۆ، 2013) تەلەحيكايالارى مەن "وگرابلەنيە پو-كازاحسكي" (رەج. قايىرجان ورىنبەكوۆ، 2014) ءفيلمى ارقىلى تانىمال اكتەر "م.اۋەزوۆ تاترىنىڭ اكتەرلىك قۇرامىندا ەڭبەك ەتىپ جۇرگەن كەزىمدە كينوسالاسىنان كوپتەگەن ۇسىنىستار كەلىپ تۇسۋىنە بايلانىستى تەاتردان كەتۋىمە تۋرا كەلدى. الايدا ونەرگە دەگەن قۇشتارىڭدى قاندىراتىن تەاتردان اسقان ونەر ورداسى جوق ەكەنىن ءتۇسىندىم"، - دەيدى.

2011-2013 جج. اكەمتەاتردا ەڭبەك ەتكەن ج.تىنبايەۆ م.سارسەكەنىڭ "تەندەرگە تۇسكەن كەلىنشەگىندە" سەرگەي (رەج. و.كەنەبايەۆ)، س.اسىلبەك ۇلىنىڭ "يمپەرياداعى" كەش" دراماسىندا بەرىكبول (رەج. ا.كاكىشيەۆا)، م.كارىمنىڭ "كۇناھارىندا" يالشىعۇل (اۋد. ءا.كەكىلبايەۆ، رەج. و.كەنەبايەۆ)، م.زادورنوۆتىڭ "كۇيەۋىڭىزدى ساتىڭىزشى" كومەدياسىندا اندرەي (رەج. و.كەنەبايەۆ)، م.اۋەزوۆتىڭ "قيلى زامانىندا" جاڭاباي، ءا.ءراحيموۆتىڭ "شاكارىمىندە" حاليتوۆ (رەج. ءا.راحيموۆ)، ت.ابدىكوۆتىڭ "ۇلى مەن ۇرى" قويىلىمىندا شاكىرت (رەج. ە.وبايەۆ، ە.نۇرسۇلتان) رولدەرىن ويناعان  بولاتىن. "ساعىنىشتىڭ سالقىنىن سالعان ۇزىلىستەن كەيىن تەاتر ساحناسىنا سۋساپ كەلدىم. سوندىقتان رولگە ۇلكەن، كىشى دەپ قارامايمىن، قانداي رول بەرسە دە قۋانا-قۋانا وينايمىن"، - دەپ اعىنان جارىلعان اكتەردى جاقىن ارادا  90-ماۋسىمنىڭ كەلەسى پرەمەراسى ع.مۇسىرەپوۆتىڭ "اقان سەرى - اقتوقتى" دراماسىنان جىلگەلدى بەينەسىندە كورە الاسىزدار.

دايىنداعان: ءمولدىر بەكجان