بۇگىندە كورشى قىرعىزستاندا وپپوزيسيا سەركەلەرىن تۇتقىنداۋ جالعاسۋدا. مۇنى ەل باسشىلىعى 17 مامىر كۇنى ءبىرقاتار ساياسي توپتار ەلدە مەملەكەتتىك توڭكەرىس جاساۋدى جوسپارلادى دەپ تۇسىندىرۋدە. بۇل تۋرالى Qamshy.kz حابارلايدى.

كەشە قىرعىزستاندا وسىمەن جەتىنشى وپپوزيسيالىق ساياساتكەردىڭ تۇتقىندالعانى بەلگىلى بولدى. ولاردىڭ بارلىعى بيلىكتى كۇشپەن باسىپ الۋعا ارەكەتتەنگەنى ءۇشىن قاماۋعا الىنىپ وتىر. ەل پرەزيدەنتى المازباەك اتامبايەۆ بولسا ەلدەگى احۋالدى تۇراقسىزداندىرىپ وتىر دەپ تەك «حالىقتىق پارلامەنت» قوزعالىسىنىڭ وپپوزيسيالىق ساياساتكەرلەرىن عانا ەمەس، جەرگىلىكتى قۇقىققورعاۋشىلار مەن «شەتەلدىك ارنايى قىزمەت گەنەرالدارىن» دا ايىپتادى. ساراپشىلار پرەزيدەنتتىڭ بۇل مالىمدەمەسىن رەسەيدى ايىپتاۋ دەپ باعالاۋدا.

پرەزيدەنت ا. اتامبايەۆ انالار كۇنىنە ارنالعان ءىس-شارا كەزىندە قىرعىزستاندا ءومىر ءسۇرۋ ۇناماي جۇرگەن ءبىراز ادامدار بارىن ايتتى. وپپوزيسيانى كەز-كەلگەن جولمەن ەلدەگى تۇراقتىلىقتى شايقاپ، بيلىككە جەتۋدى كوزدەيدى دەگەن سىڭايدا ايىپتادى. ا. اتامبايەۆ بيلىكتى باسىپ الۋ سەنارييى 12 مامىر كۇنى «حالىقتىق پارلامەنت» قوزعالىسىنىڭ فورۋمىندا تالقىلانعانىن جەتكىزدى.

«ولار بۇل فورۋمدى قانداي ماقساتپەن وتكىزدى. وندا كىمدەر بولمادى دەيسىز؟ تالعاربەكوۆ باستاعان اقايەۆشىلار دا، قالماتوۆ باستاعان باقييەۆشىلەر دە بولدى. «يسلام مەملەكەتىنىڭ» (يم-حالىقارالىق لاڭكەستىك ۇيىم) سەنىمدى جاقتاۋشىسى نۇرلان موتۋيەۆ تە بولدى. شەتەلدىك گرانتتاردى اقتاۋعا تىرىسىپ جۇرگەن تولەيقان يسمايلوۆ پەن ازيز ابدراسۋلوۆ تا بار»، - دەدى ا. اتامبايەۆ.

مۇنى ايتقان ا. اتامبايەۆ «ەل انالارى 2002 جىلدىڭ ناۋرىزىندا، 2010 جىلدىڭ ساۋىرىندە، 1990 جىلدىڭ ماۋسىمىندا، 2010 جىلدىڭ ماۋسىمىندا دا كوز جاسىن از توكپەگەنىن»، ەلگە بەيبىتشىلىك كەرەك ەكەنىن مالىمدەدى جانە مۇنداي تۇراقسىزدىققا باستايتىن ارەكەتتەر قاتاڭ تۇردە ايىپتالىپ، جولى كەسىلەتىنىن ايتتى.

جالپى ەلدە پرەزيدەنتتىڭ وتستاۆكاعا كەتۋىن تالاپ ەتەتىن نارازىلىق اكسياسىنىڭ دايىندالىپ جاتقانى تۋرالى ناۋرىز ايىندا بەلگىلى بولعان. سول كەزدە ۇلتتىق قاۋىپسىزدىك جونىندەگى مەملەكەتتىك كوميتەت بيلىكتى كۇشپەن باسىپ الۋعا دايىندىق جونىندە ءىس قوزعادى. «شىندىق» پارتياسىنىڭ جەتەكشىسى قۇبانىچبەك قادىروۆ، جالال-اباد وبلىسىنىڭ بۇرىنعى گۋبەرناتورى بەكتۇر اسانوۆ قاماۋعا الىندى. سونداي-اق، بەكبولات تالعاربەكوۆ، مارات سۇلتانوۆ سىندى وپپوزيسيونەرلەر دە تۇتقىندالدى. ۇستىلەرىنەن قىلمىستىق ءىس قوزعالىپ، قاماۋعا الىنعان باسقا دا ساياساتكەرلەردى ەل بيلىگى رەسەيلىك ارنايى قىزمەتتەرمەن بايلانىس ورناتىپ، پرەزيدەنتتى قۋۋعا ارەكەتتەندى دەپ ايىپتادى.

وپپوزيسيا وكىلدەرى بولسا، بۇل ساياسي قاقتىعىستاردىڭ جۇيەلىك سيپاتى بار ەكەنىن جانە رەسەي مەن قىرعىز رەسپۋبليكاسى باسشىلارى اراسىنداعى كەلىسپەۋشىلىكتەردەن تۋىنداپ وتىرعانىن مالىمدەۋدە.

دارحان مۇقانتەگى