قاراعاندىداعى ەكى جارىم مىڭنان استام وقۋشىسى بار №101 مەكتەپ-ليسەيى بيزنەستىڭ كوزىنە اينالعان، ، دەپ حابارلايدى Qamshy.kz 31 ارناعا سىلتەمە جاساپ.

سىرتىنان قاراساڭ كادىمگى مەكتەپ. كىرىپ-شىعىپ جاتقان وقۋشى ۇستازدار. ال، ىشىندە جيھاز شىعاراتىن شەبەرحانا بار ەكەن.ونىڭ قىزمەتى قانشالىقتى زاڭدى، زاڭسىز ەكەنىن پروكۋرورلار انىقتايدى. تەكسەرىستىڭ قورىتىندىسى ەكى كۇننەن كەيىن بەلگىلى بولادى دەدى.   ءبىر قىزىعى، شەبەرحانادا اعاشتان جاسالاتىن ۇستەل-ورىندىقتاردى وقۋشىلار دايىندايدى دەگەن سەح ينجەنەرى جيھازداردىڭ باعاسىن بەلگىلەپ قويىپتى.

قالاداعى مەكتەپ-ليسەيلەردىڭ بىرىندە كادىمگى ءۇي جيھازدارى دايىندالاتىنىن ەستىپ، تاپسىرىس بەرۋدى ءجون كوردىك. تەلەفون ارقىلى ءوزىن سەرىكپىن دەپ تانىستىرعان ازامات تاپسىرىس قابىلداۋعا دايىن ەكەن. ءتىپتى «ورىندىقتار مەن ۇستەلدەردى قالاۋىڭىزشا دايىندايمىز»،  -دەپ اعىنان جارىلدى. «تەك تاپسىرىس بەرسەڭىز بولعانى، ءتۇرلى تۇستەگى ماتامەن قاپتالعان تاۋاردى از ۋاقىتتىڭ ىشىندە ازىرلەپ بەرەمىز»،  -دەيدى. 

- دايىن جيھازداردان الساڭىز، جاقسى جەڭىلدىك جاساپ بەرەيىن. قانداي ءتۇس قالايسىز؟

- قارا ءتۇستى بولسا...

- ءسىز ءبىزدىڭ ورىندىقتاردان تاڭداڭىز، ال ءتۇسىن قالاۋىڭىزشا جاساپ بەرۋگە تىرىسامىز. 

سەرىك ەسىمدى ازاماتتىڭ ايتقانىنان تۇسىنگەنىمىز.

مەكتەپ قابىرعاسىندا دايىندالاتىن جيھازداردىڭ قۇنى مىناداي: اعاشتان جاسالعان ۇستەل - 44 000 تگ، ارقاسى بار ورىندىقتاردىڭ باعاسى - 7800 - 16 000 تگ دەيىن. 

دۇكەندەگى جيھازداردان ەش ايىرماشىلىعى جوق ۇستەل-ورىندىقتاردى دايىندايتىن مەكتەپتەگى شەبەرحانا، مىنە.  ءبىر ەمەس، ەكى بىردەي شەبەرحانادا دا جۇمىس قىزۋ قارقىندا ءجۇرىپ جاتىر. ال جيھاز جاساۋعا تەلەفون ارقىلى تاپسىرىس قابىلداعان سەرىك ەسىمدى بۇل ازاماتقا ءتۇسىرىلىم توبى اسا ۇناي قويعان جوق.  «شەبەرحانانىڭ جۇمىسى زاڭدى، سەحتا تەك وقۋشىلار جۇمىس ىستەيدى»،- دەدى.

ال  پروكۋراتۋرا وكىلدەرى مەكتەپ-ليسەيدى تەكسەرۋگە كىرىستى. قىزىعى، شەبەرحانادا كۇنى كەشە عانا تۇرعان قۇرال-جابدىقتاردى ءبىلىم وشاعىنان تابا المادىق دەيدى.

جانقوزى ناكيشيەۆ قازىبەك بي اۋداندىق پروكۋرورىنىڭ ورىنباسارى:

- بۇل ارەكەتتەرى بەينەدە كورسەتىلگەن بۇل زاڭسىز بولىپ تابىلادى. ارينە، بۇگىن باردى ءبىزدىڭ قىزمەتكەرىمىز سونى تەكسەرىپ. ءبىراق تا قازىرگى ۋاقىتىندا بۇل شەبەرحاناسىندا جاڭاعى ۆيدەودا كورسەتىلگەن ۇستەل، نەلەر جوق.

تەكسەرىس ءالى ەكى كۇنگە جالعاسادى دەگەن قۇزىرلى ورگانداعىلار تىلشىلەر كورسەتكەن بەينەجازبا بويىنشا عانا ازىرگە زاڭسىز دەگەن قورىتىندى شىعاردى. ءبىراق تۇپكىلىكتى شەشىم بىرەر كۇننەن كەيىن شىعادى. ال ءبىلىم بەرۋ زاڭىنىڭ 63 بابىنا سايكەس، وقۋ ورنىنىڭ ەرەجەسىنە ەنبەگەن جۇمىسپەن مەكتەپ قابىرعاسىندا اينالىسۋ زاڭسىز،- دەيدى قۇقىق قورعاۋشىلار. ايتا كەتۋ كەرەك، اتالمىش مەكتەپ-ليسەيدىڭ ءبىر جىلدان بەرى باسشىسى تاعايىندالماعان ەكەن.