جەر يەلەنۋشىلەرگە قاتاڭ تالاپ قويىلاتىن بولادى، - دەيدى جەر رەفورماسى جونىندەگى كوميسسيا مۇشەلەرى. بۇل تۋرالى Qamshy.kz «حابار» ارناسىنا سىلتەمە جاساپ حابارلايدى.

جەر ارعى ءۇش اتاسى قازاق جەرىندە تۋعان ازاماتتارعا عانا جالعا بەرىلسىن! بۇل – بۇگىن جەر رەفورماسى جونىندەگى كوميسسيانىڭ جانىنان قۇرىلعان قۇقىقتىق جۇمىس توبىنىڭ جەتەكشىسى مۇحتار تايجاننىڭ ۇسىنىسى.

قۇقىقتىق جانە ءاقپاراتتىق-تۇسىندىرۋ جۇمىس توپتارىنىڭ العاشقى وتىرىسىندا وزگە دە ماڭىزدى باستامالار كوتەرىلىپ، الداعى كۇندەرگە ناقتى جوسپار جاسالدى. 

جەر – كوپشىلىكتىڭ كوڭىلىن كۇپتى قىلعان وزەكتى ماسەلە. قۇقىقتىق جۇمىس توبىنىڭ وكىلدەرى جۇرتشىلىقتىڭ ويىنداعىسىن ءدوپ باساتىن ءارى بۇعان دەيىن ەسكەرىلمەگەن ءبىرقاتار ماڭىزدى ۇسىنىستار جاسادى. ماسەلەن، ءماجىلىس دەپۋتاتى بەكبولات تىلەۋحان سولتۇستىكتە بوس جاتقان شۇرايلى جەرلەردى وڭتۇستىكتىڭ حالقىنا بەرۋ كەرەك دەگەن باستاما كوتەردى. 

سونىمەن قاتار، جەردىڭ كەز كەلگەن جاعدايدا شەتەلدىكتەرگە ساتىلۋىنا تىيىم سالىنۋىن زاڭمەن بەكىتۋدى ۇسىنىپ، جالعا بەرىلگەن جاعدايدا، ول جەردە تەك قازاقستان ازاماتتارى جۇمىس جاساۋى قاجەتتىگىن اتتى. 

بەكبولات تىلەۋحان، ق ر پارلامەنتى ءماجىلىسىنىڭ دەپۋتاتى:

-ولارعا جۇمىس كۇشىن اكەلۋگە زاڭمەن تىيىم سالۋ كەرەك. بۇزعان جاعدايدا ەلدەرىنە قايتارۋ كەرەك. ياعني قانداي شەتەلدىك ينۆەستور كەلسە دە، ولاردىڭ جۇمىس ورنىندا قازاق ءيسى اڭقىپ تۇرۋ كەرەك.  

باسقوسۋدا جەردى بانككە كەپىلدىككە قويۋعا تىيىم سالۋ جايى دا تالقىلاندى. «جانە جەردى 3 جىل ىشىندە ءتيىمدى يگەرە الماعانداردان قايتارىپ الۋ ماسەلەسى كوتەرىلىپ، ونىڭ قۇنارلىلىعىن جوعالتىپ، توزدىرعانداردى جاۋاپكەرشىلىككە تارتۋ قاجەت»، – دەدى جۇمىس توبىنىڭ جەتەكشىسى مۇحتار تايجان. 

مۇحتار تايجان، جەر رەفورماسى بويىنشا كوميسسيانىڭ قۇقىقتىق جۇمىس توبى جەتەكشىسى:

ء-ۇش اتاسى قازاقستاندا تۋعان ازاماتتارىنا عانا جەردى بەرۋ كەرەك دەپ ويلايمىن. ءبىراق ارينە، ورالماندارعا، ەلىمىزگە ورالعان قانداستىرىمىزعا بەرۋىمىز كەرەك. 10 جىل ساتا المايدى، ءوزى اينالىسۋ كەرەك. سوسىن جالپى اۋدانىنىڭ كولەمىندە ەمەس، جالپى مەملەكەتتىك شەكتەۋ بولادى.  

ال ءاقپاراتتىق-تۇسىندىرۋ جۇمىس توبى «فەيسبۋكتان» جەر رەفورماسى بويىنشا كوميسسيا دەپ اتالاتىن ارنايى پاراقشا اشقان. «وندا بارلىق ازاماتتاردىڭ ۇسىنىستارى مەن جەرگە قاتىستى بۇكىل مالىمەت جاريالانادى، – دەپ سەندىردى توپ جەتەكشىسى. 

مۇرات ابەنوۆ، جەر رەفورماسى بويىنشا كوميسسيانىڭ ءاقپاراتتىق-تۇسىندىرۋ جۇمىس توبى جەتەكشىسى:

-جەر سالاسىندا قانشا زاڭ بۇزۋشىلىقتار بار؟ كىمنىڭ قولىندا؟ مىسالى، كوپ جەردى الىپ العاندار بار ەكەندىگىن بىلەمىز. قالاي العان؟ نەگە زاڭسىز الدى؟ نەگە ونى قايتىپ المايمىز؟ جانە ونىڭ ارتىندا كىم تۇر؟ ەكىنشى ماسەلە، بۇگىن جەر الا الماي جۇرگەندەر بار. ولاردىڭ جاعدايلارى قالاي بولادى؟ بارلىق دايىنداعان اقپاراتتى تەك كوميسسيا مۇشەسىنە ەمەس، ازاماتتارعا ۇسىنۋىمىز كەرەك. ءار ازامات ءبىلۋ كەرەك. 

سونىمەن قاتار، ەلىمىزدە 14 مامىردان بەرى جۇمىس جاساپ جاتقان call-ورتالىقتارىنا 2 مىڭنان استام ازامات قوڭىراۋ شالىپ، 900-گە جۋىعى ساۋالدارىن جولداعان. 

الايدا، جۇرتشىلىقتى مازالاعان سۇراقتاردىڭ تەك 30 پايىزى تىكەلەي جەر رەفورماسىنا قاتىستى.  دەگەنمەن ولاردىڭ بارلىعى تىركەۋگە الىنىپ، كوميسسيا مۇشەلەرىنىڭ قاراۋىنا جىبەرىلەدى.