استانا كۇنىنە وراي،  مەملەكەتتىك باعدارلامامەن سالىنعان ۇيلەر جاپپاي تاراتىلادى دەپ جۇرتقا سمس جىبەرگەن كەلىنشەك ۇستالدى. 30 جاستاعى ايەلدىڭ جالعان حابارلاماسىنان كەيىن  ءۇي الامىز دەگەن حالىقتىڭ  شۋى ءالى باسىلعان جوق. ال كەشەدەن بەرى 10 جۇزدىك تەلىم تيەدى-اۋ دەپ استانا اكىمدىگىن جاعالاعان جۇرت،  بۇگىن  دە تارقار ەمەس. سەبەبى ولارعا دا وسى تەكتەس Cمس-حابارلامالار كەلىپ جاتقان كورىنەدى،  - دەپ حابارلايدى Qamshy.kz 31 ارناعا سىلتەمە جاساپ.

وسىمەن ەكىنشى كۇن جۇرت جاپپاي اكىمدىك الدىن تورۋىلداپ ءجۇر. ءتىپتى وسىندا تۇنىمەن وتىرعاندار بار ەكەن. ءبارىنىڭ ءۇمىتى-سول 10 جۇزدىك تەلىم. كەشە اكىمدىك جەر بيىل بەرىلمەيدى دەسە دە، ەشكىمنىڭ الاڭنان اياق اتتاپ باسقىسى جوق. سەبەبى مۇنداعى قىزمەتكەرلەر كەزەك جاساپ، تۇرعىنداردىڭ ءوتىنىش-قۇجاتتارىن قابىلداپ جاتىر. سوندىقتان تەلىمنەن قۇر قالۋعا قورىققان جۇرت ۇلتاراقتاي جەر ايتەۋىر بۇيىرادى ما دەپ ۇمىتتەنىپ ءالى وتىر.

"قۇر ۇمىتتەندىرمەي الدىمىزعا شىعىپ جەر بەرىلمەيدى، تاراڭدار" دەپ ايتسىن دەيدى جينالعاندار. الايدا جەتى وڭىردە جەر بيىل بەرىلەدى دەگەن ۇلتتىق ەكونوميكا مينيسترلىگىنىڭ حابارلاماسىنا كەشە اكىمدىك جاۋاپ بەرگەن. استانا مەن الماتىدا دايىن جەر جوقتىعىن دا ايتقان.

تولەۋعازى نۇركەنوۆ، استانا قالاسى جەر قاتىناستار باسقارماسىنىڭ باسشىسى:

- استانانىڭ باس جوسپارىنا سايكەس 45 مىڭ جەكە تۇرعىن ءۇي كوزدەلگەن. ونىڭ 30 مىڭى سالىنىپ قويىلدى. 2030 جىلعا دەيىن اتالمىش جەرلەرگە سۋ جۇرگىزىلىپ، ەلەكتر تارتىلعاننان كەيىن عانا قالعانىن بەرە الامىز. ءازىر جەرلەر دايىن ەمەس.  

ءبىراق تۇرعىندار تارقار ەمەس. اكىمدىك بولسا، وتىنىشتەردى قابىلداماۋعا قۇقىعىمىز جوق دەپ وتىر. ءبىراق، ءوتىنىش قابىلداندى دەگەن - جەر بەرىلەدى دەگەندى بىلدىرمەسە كەرەك. ال سەنگىش جۇرتتىڭ توپتالىپ جينالعانىن پايدالانعان بازبىرەۋلەر مۇندا كادىمگىدەي بيزنەس جاساپ ءجۇر. مۇنسىز قابىلدامايدى دەپ سەندىرىپ، ءوتىنىش جازاتىن بلانكىنى 100 تەڭگەگە ساۋدالاعاندار تابىلدى.

ءبىر پاراقتى 100-50 تەڭگەگە الىپ جاتقاندار ءتىپتى تەلىم تاراتىلادى دەگەن حابارلاما العانىن ايتادى. ول ءۇشىن اكىمدىككە كەلىڭدەر دەگەن ءماتىن دە بولعان. ال كۇنى كەشە مەملەكەتتىك باعدارلامامەن سالىنعان ۇيلەر بەرىلەدى دەپ سمس تاراتىپ، جۇرتتى دۇرلىكتىرگەن كەلىنشەك بۇگىن ۇستالىپتى. بۇرىن الاياقتىق ءۇشىن ءىستى بولعان 30 جاستاعى ايەل وسى جولعى جالعان حابارلاماسى ءۇشىن 1 جىلعا سوتتالۋى مۇمكىن.

سوفيا انۋاربەكوۆا، استانا قالاسى، ءىىد باسپا ءسوز جەتەكشىسى:

- كۇدىكتىگە تيەسىلى تەلەفون، سيم كارتا تاركىلەندى. تەرگەۋ بارىسىندا انىقتالعانداي بۇرىن بۇل ازاماتشا قىلمىستىق ىسكە تارتىلعان.

ال تەلىم بويىنشا سمس جىبەرگەندەردىڭ كىم ەكەنى ازىرگە بەلگىسىز. جاۋاپتى ورگاندار ءمان-جايدى انىقتايمىز دەپ وتىر.