الماتى اكىمدىگىندەگىلەر ازاماتتارعا جەكە تۇرعىن ءۇي قۇرىلىسىنا تەگىن جەر ۋچاسكەلەرىن بەرۋ ماسەلەسىنە قاتىستى تۇسىنىك بەردى، - دەپ حابارلايدى Qamshy.kz Tengrinews.kz – كە سىلتەمە جاساپ.

جەرگىلىكتى اتقارۋشى ورگاننىڭ مالىمەتىنشە، الماتى قالاسى تەرريتورياسىندا بوس جاتقان جەر ۋچاسكەلەرىنىڭ جوق بولۋىنا بايلانىستى، قازىرگى ۋاقىتتا قالادا جەر ۋچاسكەلەرىن جەكە تۇرعىن ءۇي قۇرىلىسىنا بەرۋ مۇمكىن ەمەس.  

"الماتى قالاسى باس جوسپارىنا سايكەس، الماتى قالاسى ءماسليحاتىنىڭ 2006 جىلدىڭ 20 قاراشادا بەكىتكەن №284 شەشىمىمەن جەكە تۇرعىن ءۇي قۇرىلىسىنا جاڭا اۋدانداردى دامىتۋ قاراستىرىلماعان"، - دەلىنگەن حابارلامادا. 

ايتا كەتەيىك، جەر كودەكسىنە سايكەس، قازاقستان ازاماتتارى جەكە تۇرعىن ءۇي قۇرىلىسىنا ءوز مەنشىگىنە تەگىن 10 سوتىق جەر الا الادى. 

ەسكە سالايىق، وسىعان دەيىن ق ر ۇلتتىق ەكونوميكا مينيسترلىگىنىڭ وكىلدەرى قازاقستاندىقتارعا جەكە تۇرعىن ءۇي قۇرىلىسىنا تەگىن 10 سوتىق جەردى بەرۋ ءتارتىبىن تۇسىندىرگەن بولاتىن. قازىرگى ۋاقىتتا تەگىن جەر الۋ كەزەگىندە 1 ميلليون 129 مىڭ قازاقستاندىق تۇر ەكەن. مينيسترلىكتەگىلەر قازاقستان ازاماتتارىنىڭ 10 سوتىق جەردى تەگىن الۋعا قۇقى بار ەكەنىن ەسكە سالدى. الايدا جەرگىلىكتى اتقارۋشى ورگاندار كوممۋنيكاسيا جۇرگىزىلگەن جاعدايدا عانا بەرەدى ەكەن. 

ەلىمىزدە بۇل نورما قابىلدانعالى بەرى جەكە تۇرعىن ءۇي قۇرىلىسى جەرلەرىن الۋعا 1 547 141 ءوتىنىش ءتۇسىپتى. 2005 جىلدان باستاپ قازاقستاندىقتارعا 417 949 جەر ۋچاسكەسى بەرىلدى: وقو - 81 190، اقمولا وبلىسى - 40 147، الماتى وبلىسى - 59 169، ماڭعىستاۋ وبلىسى - 43 276. استانا مەن الماتىدا 10 جىل ىشىندە حالىققا 1447 جانە 26 444 جەر ۋچاسكەسى بەرىلىپتى.