قالالىق ءماسليحاتتىڭ VI كەزەكتەن تىس شاقىرىلىمىندا قالا اكىمى باۋىرجان بايبەك مەدەۋ جانە ناۋرىزباي باتىر اۋداندارىنىڭ اكىمىن تاعايىندادى، - دەپ حابارلايدى Qamshy.kz.

«مەدەۋ اۋدانىندا 200 مىڭ ادام تۇرادى. بۇل قالا حالقىنىڭ 12 پايىزى. 22 مىڭ ستۋدەنت تۇرادى. مۇندا مەدەۋ، شىمبۇلاق نەگىزگى نىساندارى، 60 مادەني نىسان ورنالاسقان. اۋدان 400 ملرد تەڭگە كولەمىندە تابىس اكەلەدى. 109 ملرد ينۆەستيسيا جانە بار»، - دەگەن قالا باسشىسى ەرجان جىلقىبايەۆتى مەدەۋ اۋدانىنىڭ اكىمى ەتىپ تاعايىندادى. 

ەرجان جىلقىبايەۆ 1982 جىلى وقو-دا دۇنيەگە كەلگەن. 2003-2004 جىلدارى وقو ەكونوميكا دەپارتامەنتىنىڭ باس مامانى، 2007 جىلى ەكونوميكا جانە بيۋدجەتتىك جوسپارلاۋ مينيسترلىگىندە ءبولىم باسشىسى، 2007-2009 جىلدارى ەڭبەك جانە الەۋمەتتىك قورعاۋ ءمينيسترىنىڭ كومەكشىسى، 2009 جىلى شقو اكىمىنىڭ كومەكشىسى، 2014-2016 جىلدارى ق ر پرەزيدەنتى اكىمشىلىگى ءبولىمىنىڭ مەملەكەتتىك ينسپەكتورى قىزمەتىن اتقارىپ كەلگەن. 

اۋداننىڭ ەكس-اكىمى سۇلتانبەك ماكەجانوۆ ءوزىنىڭ دەنساۋلىعىنا بايلانىستى جۇمىستان كەتۋ تۋرالى ارىز جازعان.

قالالىق ءماسليحاتتىڭ وسى شاقىرىلىمىندا باۋىرجان بايبەك ناۋرىزباي اۋدانىنىڭ دا جاڭا اكىمىن تاعايىندادى. 

«ناۋرىزباي اۋدانى 2014 جىلى قۇرىلعان. مۇندا 150 مىڭ ادام تۇرىپ جاتىر. رەسمي تىركەلگەندەردىڭ سانى 53 مىڭ. حالىقتىڭ كوپشىلىگى تولىق كولەمدە سالىق تولەپ وتىرعان جوق. جىلجىمايتىن مۇلىك، اۆتوموبيل تىركەلمەگەن. تابىستىق بازا بويىنشا وتە كۇردەلى اۋدان. تۇرعىن ءۇي قورىندا پروبلەما جەتەدى. ورتاق كەشەندى جوسپار بولۋ كەرەك»، - دەگەن قالا اكىمى بۇل اۋدانعا باسشى ەتىپ سايران سايفەدەنوۆتى تاعايىندادى.

سايران سايفەدەنوۆ 1974 جىلى بقو-دا دۇنيەگە كەلگەن.

2006 جىلدان باستاپ المالى اۋدانىنداعى ۇيىمداستىرۋ جانە كادرلىق باسقارماسىندا باس مامان بولىپ جۇمىس ىستەگەن.

2008 جىلدىڭ تامىزىنان الماتى اكىمى اپپاراتىنىڭ ۇيىمداستىرۋ جانە كادرلىق باسقارماسىندا باس مامان قىزمەتىن اتقارعان. 2009 جىلدىڭ ماۋسىمىنان اۋەزوۆ اۋدانى اكىمىنىڭ ورىنباسارى بولىپ قىزمەت ەتتى.

ناۋرىزباي اۋداننىڭ بۇرىنعى اكىمى قۋانىش قاشقىمبايەۆ مەملەكەتتىك باسقارماعا جەتەكشى بولىپ تاعايىندالماق.