قازاقستاننىڭ باس پروكۋراتۋراسى ەلدە زاڭسىز ميتينگىلەر وتكىزۋ اركەتتەرى جايلى مالىمدەمە جاسادى، - دەپ حابارلايدى Qamshy.kz.

باس پروكۋراتۋرا وكىلدەرىنىڭ ايتۋىنشا، ەلىمىزدىڭ جەكەلەگەن وڭىرلەرىندە جەر ماسەلەلەرى جونىندە زاڭسىز قارسىلىق شەرۋلەرىن وتكىزۋگە ارەكەتتەر جاسالدى. "شىنايى اقپارات بەرۋ ماقساتىندا سىزدەرگە تومەندەگى ماسەلەلەردى حابارلاي الامىز. زاڭسىز ارەكەتتەردىڭ الدىن-الۋ ءۇشىن باس پروكۋرور حالىققا ەكى رەت ۇندەۋ جولداپ، ميتينگ وتكىزۋدىڭ ءتارتىبى مەن زاڭسىز شەرۋلەرگە قاتىسقانى ءۇشىن ازاماتتاردىڭ جاۋاپكەرشىلىگىن ءتۇسىندىردى. بۇل ۇندەۋلەر بۇقارالىق اقپارات قۇرالدارى جانە باسقا دا كوممۋنيكاسيا ارنالارى ارقىلى كەڭىنەن تاراتىلدى. سونىمەن بىرگە، زاڭسىز شەرۋلەرگە قاتىسۋ نيەتىن اشىق جانە تۋرا جاريا ەتكەن بارلىق ادامدارمەن ءتۇسىندىرۋ جۇمىستارى جۇرگىزىلدى"، - دەلىنگەن حابارلامادا.

وسىعان قاراماستان، جەكەلەگەن تۇلعالار ميتينگتەر تۋرالى زاڭنامانى ەلەمەي، ادامداردى زاڭسىز شەرۋلەرگە قاتىسۋعا يتەرمەلەپ، ارانداتۋعا تىرىسىپتى. ولاردىڭ تۇپكى ماقساتتارى، پروكۋراتۋراداعىلاردىڭ ايتۋىنشا، بەيبىت شەرۋلەر نەمەسە جەر كودەكسىن وزگەرتۋ ەمەس، قوعامدىق ساياسي احۋالدى شيەلەنىستىرۋ، ۇلتارالىق الاۋىزدىقتى قوزدىرۋ جانە بيلىكتى باسىپ الۋ.

"ولار جاپپاي تارتىپسىزدىكتەردىڭ بۇلىككە، وزبىرلىققا، توناۋعا، ءتىپتى ادام شىعىنىنا اكەلىپ سوقتىرۋى مۇمكىن ەكەنىن جاقسى بىلەدى. ونداي وقيعالاردىڭ سالدارى قانداي بولارىنا ليۆيا، سيريا، مىسىر جانە ءبىرقاتار بۇرىنعى كەڭەستىك كەڭىستىكتەگى ەلدەر ايقىن مىسال بولا الادى. بۇگىندە قۇقىق قورعاۋ ورگاندارى ءبىرقاتار قىلمىستىق ىستەردى تەرگەۋدە. جاپپاي تارتىپسىزدىكتەردى ۇيىمداستىرۋ ءۇشىن سان ءتۇرلى تاسىلدەر پايدالانىلدى. قىزىلوردا قالاسىندا ءتارتىپ ساقشىلارىنا تاس لاقتىرىپ، ولاردى كۇش قولدانۋعا يتەرمەلەۋ ارەكەتتەرى جاسالدى"، - دەپ حابارلادى باس پروكۋراتۋراداعىلار.

سوسىن، الەۋمەتتىك جەلىلەردە ءتارتىپ ساقشىلارى ءولتىردى دەپ، ەر ادامنىڭ ءمايىتىنىڭ سۋرەتى تاراتىلدى. شىن مانىندە، بۇل قىتايدا بولعان وقيعادان تۇسىرىلگەن سۋرەت بولعانى، بۇل اقپاراتتاردىڭ جالعاندىعى ۋاقتىلى اشكەرەلەنگەنى ايتىلادى.

شىعىس قازاقستان وبلىسىندا پوليسيانىڭ نازارىن وبلىس ورتالىعىنان باسقا جاققا اۋدارىپ، وسكەمەن قالاسىندا تارتىپسىزدىكتەر ۇيىمداستىرۋدى جەڭىلدەتۋ ءۇشىن ءبىرقاتار اۋدان ورتالىقتارىندا الدىن-الا شەرۋلەر ۇيىمداستىرۋ جوسپارلانعان. ورال مەن اتىراۋدا بەيبىت شەرۋدى جەلەۋ ەتە وتىرىپ بيلىككە كۇش قولدانۋ، ونىڭ ىشىندە قارۋ قولدانۋ ارقىلى قارسى شىعۋعا دايىندىقتار جاسالعان.

ارانداتۋشىلاردىڭ ارەكەتتەرى ءوزارا كەلىسىلگەن سيپاتتا بولعانى تۋرالى مالىمەتتەر بار. الماتىدا جۇرگىزىلگەن جەدەل شارالار بارىسىندا قالادا جاپپاي تارتىپسىزدىكتەر ۇيىمداستىرۋعا دايىندالعان ءبىرقاتار تۇلعالار ۇستالدى.

وندا قارۋ-جاراق، ءوق-دارى، بىلتەمىرلەر، "مولوتوۆ كوكتەيلى" دەپ اتالاتىن جانارمايلار قۇيىلعان شولمەكتەر جاسىرىلعان قويمالار تابىلدى. مۇنىڭ ءبارى پرەزيدەنت موراتوريي جاريالاعان جانە جەر زاڭناماسىنا قاتىستى ۇسىنىس ەنگىزگىسى كەلەتىن بۇكىل ازاماتتار جۇمىسىنا قاتىسىپ جاتقان كوميسسيا مەن بارلىق وڭىرلەردەگى قوعامدىق كەڭەستەردىڭ جۇمىسى باستالعان كەزدە بولدى.

مەملەكەت تاراپىنان جەر كودەكسىنە بايلانىستى وركەنيەتتى ديالوگقا جانە بارشا پىكىرلەردىڭ ەسكەرىلۋىنە بارلىق جاعداي جاسالدى. وسىلايشا، ءتۇرلى وڭىرلەرىندە بولعان زاڭسىز اكسيالاردىڭ ءبارى ءبىر قولدان شىققانداي اسەر قالدىرادى. اتالعان قىلمىستىق ىستەردىڭ اياسىندا وسى قۇقىققا قايشى ارەكەتتەردىڭ زاڭسىز قارجىلاندىرىلۋى زەرتتەلۋدە، ولاردىڭ قارجى كوزدەرى تۋرالى اقپاراتتار تەكسەرىلۋدە.

"تەرگەۋ ناتيجەسى بويىنشا، ارانداتۋعا قاتىسى بار ادامداردىڭ ىس-ارەكەتتەرىنە قۇقىقتىق باعا بەرىلەتىن بولادى. تەرگەۋ امالدارى تولىققاندى بولۋى ءۇشىن بۇل فاكتىلەرگە قاتىستى جۇرگىزىلىپ جاتقان تەرگەۋ جۇمىستارى جايلى ەگجەي-تەگجەيلى ايتىلمايدى. الداعى ۋاقىتتا باس پروكۋراتۋرا تەرگەۋ شارالارىنىڭ بارىسى تۋرالى تۇراقتى تۇردە اقپارات بەرىپ وتىراتىن بولادى"، - دەلىنگەن تارالعان حابارلامادا.