ءابدىۋاقاپ قارا، تۇركياداعى ميمار سينان كوركەمونەر ۋنيۆەرسيتەتىنىڭ پروفەسسورى، تاريح عىلىمىنىڭ دوكتورى، تۇركىتانۋشى، مۇستافاتانۋشى. ول 1961 جىلى 19 قاراشادا تۇركيانىڭ ستامبۇل قالاسىندا تۋعان. 1982 جىلى بوعازيچي ۋنيۆەرسيتەتىنىڭ ەلەكترونيكا ءبولىمىن ءبىتىردى. ەڭبەك جولىن ستامبۋل قالاسىنداعى اتاتۋرك اۋەجايىندا ەلەكترونيكا دەپارتامەنتىندە تەحنيك مامان بولۋدان باستادى. 1986 جىلى ستامبۇل ۋنيۆەرسيتەتىنىڭ تاريح فاكۋلتەتىن بىتىرەدى. 1986-1988 جىلدارى ستامبۇلدا «قازاق تۇركىلەرى قورىندا» باسقارۋ القاسى مۇشەلىگىنە سايلانادى. 1987-1988 جىلدارى ستامبۇلداعى وسمان مەملەكەتى مۇراعاتىندا جۇمىس ىستەيدى. 1988- 1995 جىلدارى گەرمانيانىڭ ميۋنحەن قالاسىنداعى «ازاتتىق» راديوسىنىڭ قازاق رەداكسياسىندا جۇمىس ىستەدى. 1994 جىلدارى ميۋنحەن قالاسىندا «ەۆروپا قازاقتارى» دەگەن اتپەن كىتاپشا شىعارعان. 1995 جىلى گەرمانيادان تۇركياعا قايتىپ، ميمار سينان ۋنيۆەرسيتەتىنە وقىتۋشى جانە عىلىمي قىزمەتكەر رەتىندە جۇمىسقا كىردى. 1997 جىلى وسى ۋنيۆەرسيتەتتە «1986 جىلعى جەلتوقسان وقيعالارى» اتتى ماگيسترلىك، 2002 جىلى «مۇستافا شوقايدىڭ ءامىرى مەن كۇرەسى» تاقىرىبىندا دوكتورلىق ديسسەرتاسيا قورعادى. وسى جىلدىڭ قاراشا ايىندا دوكتورلىك ديسسەرتاسياسى «تۇركىستان جالىنى. مۇستافا شوقايدىڭ ءومىرى مەن كۇرەسى» دەگەن اتپەن ستامبۇلدا جارىق كوردى. 2004 جىلى بۇل كىتاپ قازاقشاعا اۋدارىلىپ، «مۇستافا شوقاي. ءومىرى، كۇرەسى، شىعارماشىلىعى» دەگەن اتپەن الماتىدا «ارىس» باسپاسىنان جارىق كوردى.

سۋرەت: Abdulvahap Kara-نىڭ Facebook-تاعى جەكە پاراقشاسىنان الىندى