جەر رەفورماسى بويىنشا قوعامدىق كوميسسيانىڭ ءتوراعاسى، ق ر پرەمەر-مينيسترىنىڭ ءبىرىنشى ورىنباسارى باقىتجان ساعىنتايەۆ كەلەسى كەزدەسۋدى اقمولا وبلىسىندا وتكىزۋدى ۇسىندى، - دەپ حابارلايدى Qamshy.kz.

ونىڭ ايتۋىنشا، وڭىرلەردە كوميسسيا وتىرىسىندا ايتىلعان ۇسىنىس-كەڭەستەردى حالىققا جەتكىزىپ، جەرگىلىكتى جەردەگى ادامداردىڭ وي-پىكىرلەرىن جيناپ الۋ قاجەت. «سوسىن ونىڭ بارلىعىن ءبىر جۇيەگە كەلتىرۋ كەرەك. سول سەبەپتى كەلەسى وتىرىسىمىزدى وڭىرلەرگە شىعۋدى باستاساق. كوشپەلى كەڭەس دەيدى عوي. بارىمىزگە، 75 ادامعا (ءبىر جەرگە – اۆت.) بارۋ مىندەت ەمەس. ءوزىمىز توپ-توپقا ءبولىنىپ، ءاربىر وڭىرگە بارۋعا بولادى. ماسەلەن، ءبىر توپتى مەن باستاپ بارامىن. ەكىنشى توپتى مۇحتار ابرار ۇلى (قۇل-مۇحاممەد)، ءۇشىنشى توپتى اسقار يسابەك ۇلى (مىرزاحمەتوۆ) باستاپ الىپ بارادى. ەگەر ءبارىمىز 75 ادام بولىپ ءبىر جەردە جۇرسەك، (جۇمىستىڭ – اۆت.) بەرەكەسى كەتەدى. سول سەبەپتى كەستە جاساپ، جولعا شىعىپ، بارلىق وڭىرلەردە...مۇمكىن ماۋسىم ايىندا ءۇش-تورت وبلىستى ارالاپ ۇلگەرەمىز بە. سوڭىنان ءبىر اقىلداسىپ الىپ، سوڭىنان شىلدە ايىندا تاعى شىعىپ، ال تامىزدا كەلىپ، قورىتىندى جۇمىسقا كىرىسەمىز. سوندا ناعىز شەشىم بولادى»، - دەدى ب.ساعىنتايەۆ.

كوميسسيا ءتوراعاسى كەلەسى كەزدەسۋدى اقمولا وبلىسىندا وتكىزۋدى ۇسىندى. ارتىنان كوميسسيا توپ-توپقا ءبولىنىپ، ارنايى ءىس-ساپار كەستەسى بويىنشا وڭىرلەردى ارالايتىن بولادى. «حالىق تا كۇتىپ وتىر. ءبارىنىڭ قولىندا ينتەرنەت بار ەمەس. اۋىلدى جەرلەر ينەرنەتتى كورىپ وتىرعان جوق ەندى. ءبىلىپ وتىرمىز عوي. كەشكى جاڭالىقتان بەرگەنىن عانا كورەدى. ال ەگەر تىكەلەي سويلەسەتىن بولساق، باسقاشا اقپارات بەرەتىن ەدىك، باسقاشا ۇسىنىس-پىكىر الىپ كەلەتىن ەدىك. وسىعان كەلىسسەك، وندا ءبىزدىڭ جۇمىسىمىز اقمولا وبلىسىنا شىعىپ، كوكشەتاۋ قالاسىنداعى كەزدەسۋدەن باستايمىز»، - دەپ اتاپ كورسەتتى كوميسسيا ءتوراعاسى ب.ساعىنتايەۆ.

وسى ورايدا كوميسسيا مۇشەسى، ەكونوميست جانۇزاق اكىم وڭىرلەردە وتەتىن كوميسسيا كەڭەستەرىن قوعامدىق تىڭداۋلار ۇلگىسىندە وتكىزۋدى ۇسىندى. "بىزگە تەلە كامەرالاردىڭ الدىندا جىلتىراپ ءجۇرىپ، جۇمىستى قوپارىپ جاتىرمىز دەپ كولگىرسۋدىڭ قاجەتى جوق. اۋىلدا مادەنيەت ءۇيى بولسا، سول جەرگە حالىقتى جيناپ، بارلىق ماسەلەلەردى كەڭىنەن تالقىلايىق"- دەدى ول.