26 جاستاعى قاسكەلەڭ قالاسىنىڭ تۇرعىنى بىرنەشە ءتۇن بويى «تانكتەر» ونلاين-ويىنىن ويناعان. كەيىن قولى السىزدەنە باستاعانىن، ودان كەيىن جالپى السىزدىكتى سەزىنىپ، سوڭىرا جىگىت ەسىنەن تانىپ قالعان، - دەپ حابارلايدى Qamshy.kz  №7 قالالىق كلينيكالىق اۋرۋحاناسىنىڭ باسپا ءسوز قىزمەتىنە سىلتەمە جاساپ.

ينسۋلتكە شالدىققان جىگىت اۋرۋحاناعا جەتكىزىلدى. ول قالالىق اۋرۋحانانىڭ رەانيماسياسىندا ءبىر تاۋلىككە جۋىق جاتقان. دەنەسىنىڭ ءبىر بولىگى تولىق ىستەن شىققان. كەيىن ونى الماتى قالاسىنىڭ №7 قالالىق كلينيكالىق اۋرۋحاناسىنا اۋىستىردى. مۇندا  №1 ينسۋلت بولىمشەسىنىڭ ماماندارى جىگىتتىڭ ومىرىنە اراشا ءتۇستى. بىرنەشە كۇننەن كەيىن ول قايتا قوزعالا باستادى، كەيىن وزدىگىنشە ءجۇرىپ، سويلەي باستادى.  

مەديسينالىق مەكەمەدە تۇسىندىرگەندەي، 9 كۇننەن كەيىن جىگىت ءجۇردى، وڭ قولىن قوزعالتا الادى، سويلەيدى، دەگەنمەن سويلەۋ قابىلەتى ناشارلاعان.