الماتىدا ساياسي قۋعىن-سۇرگىن قۇرباندارىنا ەسكەرتكىش قويىلادى. الماتى اكىمى باۋىرجان بايبەك بۇگىن ساياسي قۋعىن-سۇرگىن قۇرباندارىن ەسكە الۋعا ارنالعان جيىندا وسىلاي دەپ مالىمدەدى. بۇل تۋرالى Qamshy.kz حابارلايدى.

اشارشىلىق زاردابى مەن ساياسي قۋعىن-سۇرگىن تۋرالى ءسوز العان باۋىرجان بايبەك بۇگىنگى بەيبىت ءومىرىمىزدىڭ، ەلىمىزدىڭ گۇلدەنۋىنىڭ ءبىر كەپىلى كەشەگى الاش قايراتكەرلەرىنىڭ جانكەشتى قىزمەتى ەكەنىن ايتا كەلىپ، جاقىندا الماتىدا ناۋرىزباي باتىر مەن قابانباي باتىر كوشەلەرىنىڭ قيىلىسىنداعى ساياباقتا ساياسي قۋعىن-سۇرگىن قۇرباندارىنا ەسكەرتكىش ورناتىلاتىنىن مالىمدەدى.

«ەلباسىنىڭ تاپسىرماسىمەن الماتىداعى قاراعايلى ساياباعىنا ءزاۋلىم ەسكەرتكىش تۇرعىزىلاتىن بولدى. تاۋەلسىزدىكتىڭ 25 جىلدىعىن مەرەكەلەۋ اياسىندا ەسكەرتكىش جوباسىنا بايقاۋ جاريالانادى»، - دەدى قالا باسشىسى.

قالا اكىمىنىڭ بۇل مالىمدەمەسىن ءىس-شاراعا جينالعان جۇرتشىلىق جىلى قابىلدادى.

«ءبىز جيىرما جىلدان بەرى تالاپ ەتىپ كەلە جاتقان ماسەلە بۇگىن ناقتى شەشىلگەنىنە كۋا بولىپ وتىرمىز. بۇل – ۇلكەن جەڭىس. ساياسي قۋعىن-سۇرگىن مەن اشارشىلىقتىڭ تاريحىمىزدا الار ورنى زور. ول حالىق ساناسىنان وشپەۋى كەرەك. ازاماتتاردىڭ ەندىگى مىندەتى استاناداعىداي، الماتىداعى ميرزويان كوشەسىنىڭ اتىن وزگەرتۋگە قول جەتكىزۋ»، - دەيدى ساياساتكەر مۇحتار تايجان. ساياساتكەر سونداي-اق، اشارشىلىق پەن ساياسي قۋعىن-سۇرگىن قۇرباندارىنا قۇقىقتىق مارتەبە بەرەتىن ارنايى زاڭ قابىلداۋدىڭ دا كۇن تارتىبىنەن تۇسپەيتىنىن اتاپ ءوتتى. 

ساياسي قۋعىن-سۇرگىن قۇرباندارىن ەسكە الۋگە ارنالعان جيىنعا مۇحتار شاحانوۆ، سماعۇل ەلۋباي باستاعان زيالى قاۋىم وكىلدەرى، قوعامدىق-ساياسي ۇيىمداردىڭ جەتەكشىلەرى، بەلسەندى ازاماتتار قاتىستى.

قالادا وسى قارالى كۇنگە ارنالعان ءىس-شارالار ءالى جالعاسۋدا. ءقازىر الماتى قالاسىنىڭ ورتالىق مەشىتىندە قۇرباندار رۋحىنا قۇران باعىشتالىپ، «جۇلدىز» مەيرامحاناسىندا اس بەرىلەدى.

سونداي-اق، وسى ءىس-شارا اياسىندا ازاماتتىق بەلسەندىلەر مەن جۋرناليستەرگە تاۋەلسىز "ازاتتىق" سىيلىعىن تابىستاۋ ءراسىمى وتۋدە.