گەرمانيادا تومەنگى ساكسونيا جەرىندە 91 جاستاعى قارت اجە پويىز استىنا ءتۇسىپ، امان قالدى. ول كەنەتتەن پايدا بولعان پويىزدىڭ سوققىسىنان قۇتىلۋ ءۇشىن رەلستەردىڭ تۋرا ورتاسىنا جاتا قالعان، - دەپ حابارلايدى Qamshy.kz baq.kz -كە سىلتەمە جاساپ.

The Local باسىلىمىنىڭ مالىمەتتەرى بويىنشا، الدىندا تىرەۋىش اربا سۇيرەگەن كەيۋانا رەلستەردى لانگۆەدەل تەمىرجول ستانساسىندا كەشىپ وتپەك بولعان. الايدا ساعاتىنا 160 شاقىرىم جىلدامدىقپەن جىلجىعان پويىز اجەنىڭ جولدان وتۋىنە كەدەرگى كەلتىرىپتى. پويىزدان قاشىپ قۇتىلا المايتىنىن سەزگەن قارت ايەل رەلستەردىڭ تۋرا ورتاسىنا جاتىپ الىپ، ارباسىن ءوزىنىڭ ۇستىنە قويادى.

باسىلىم حابارلاعانداي، ەكسپرەسس پويىزدىڭ جۇرگىزۋشىسى سوققىنى ەستىگەن، ءبىراق جابايى اڭدى قاقتىم دەپ ويلاپتى. كولىكتىڭ قانشالىقتى زاقىمدانعانىن تەكسەرۋ ءۇشىن توقتاپ، تىسقا شىققان ماشينيست پويىزعا ءىلىنىپ قالعان اربانى كورەدى.

كەيىن تۋرا سول جولمەن كەلە جاتقان كەزەكتى پويىزدىڭ جۇرگىزۋشىسى الدا جاتقان قارت اجەيدى الدىن الا اڭعارىپ، توقتاپ، جەدەل جاردەم شاقىرعان. ءقازىر 91 جاستاعى اجەنىڭ ومىرىنە ەش ءقاۋىپ ءتونىپ تۇرعان جوق.

پوليسەيلەر مۇنداي جاعدايدا امان قالۋ ەكىنىڭ بىرىنە بۇيىرا بەرمەيتىن مۇمكىندىك دەيدى. سەبەبى رەلستەردىڭ تۋرا ورتاسىندا جاتقاننىڭ وزىندە اۋىر جاراقات پەن اجالدان قۇتىلۋ نەكەن-ساياق. ادامدى پويىز باسىپ، نەمەسە كولىكتىڭ شىعىپ تۇرعان بولشەكتەرى كيىمىن ءىلىپ كەتۋ ءقاۋپى باسىم.