ۇلىبريتانيا ەلشىلىگى ەلشى كەرولي براۋننىڭ اتىنان تاراتقان رەسمي حابارلامادا مارتەبەلى پاتشايىمنىڭ مەرەيتويىن اتاپ ءوتۋ قازاقستانداعى ازا تۇتۋ كۇنىنە بايلانىستى باسقا ۋاقىتقا اۋىستىرىلاتىنى جازىلعان. بۇل تۋرالى Qamshy.kz حابارلايدى.

«بۇگىنگى كۇن قازاقستاننىڭ باتىسىندا اقتوبە قالاسىندا 5 ماۋسىمدا ورىن العان شاپقىنشىلىق قۇرباندارىنا وراي قارالى كۇن.

وسى ءبىر قازاقستان حالقى ءۇشىن ازالى كۇنى، حالىققا كورسەتكەن كۇرمەت بەلگىسى رەتىندە بۇگىنگى كۇنى ۇلى مارتەبەلى پاتشايىمىزدىڭ 90 جىلدىق مەرەيتويىن اتاپ وتۋگە ارنالعان مەرەكەنى باسقا كۇنگە اۋىستىرۋعا شەشىم قابىلدادىم. قازاقستان ءۇشىن وسى ءبىر قارالى كۇنى بىزدەر ەل اراسىنداعى دوستاستىعىمىزدى باسقاشا اتاپ وتە المايمىز.

وسى ءىس-شارانى 2016 جىلعى 17 ماۋسىم كۇنى الدىندا بەلگىلەنگەن ۋاقىت پەن ورىندا وتكىزۋگە اۋىستىردىق.

ەگەر ءسىز شاقىرۋ قاعازىن الساڭىز، ونى ساقتاپ، وزىڭىزبەن بىرگە 17 ماۋسىمدا وتەتىن ءىس-شاراعا الىپ كەلىڭىز. شاقىرۋ قاعازىن اۋىستىرمايمىز»، - دەپ جازىلعان ۇلىبريتانيا ەلشىلىگىنىڭ حابارلاماسىندا.

بۇگىنگى كۇن ەلباسى وكىمىمەن ەل اۋماعىندا جالپىۇلتتىق ازا تۇتۋ كۇنى رەتىندە جاريالاندى. وسىعان وراي بارلىق مەملەكەتتىك مەكەمەلەردە مەملەكەتتىك تۋ تومەن ءتۇسىرىلىپ، قوعامدىق ورىندار مەن اقپارات قۇرالدارىندا كوڭىل كوتەرۋ باعدارلامالارى توقتاتىلدى.