نەبىر قۇيتىرقى اڭىزداردى قيىننان قيىستىرىپ جۇرگەن «ەۋرازيا» ارناسى وزدەرىنىڭ تەرىس پيعىلدارىنا قازاق قوعامىندا زور بەدەلگە يە، سوزدەرى ءوتىمدى مامانداردى دا پايدالانۋدى ادەتكە اينالدىرعان. بۇل تۋرالى Qamshy.kz حابارلايدى.  

وتكەن مامىر اينىدا تەلەارنا ەكى كۇن قاتارىنان (28،29 مامىر كۇندەرى) ساياساتتانۋشى دوسىم ساتبايەۆتىڭ بۇرىنىراقتا مۇلدەم باسقا ماسەلەگە وراي بەرگەن سۇحباتىن قيىپ الىپ، رۇقساتسىز پايدالانعان. پايدالانعاندا دا تۇتاستاي ءبىر حالىقتى، جەر تاعدىرى مەن انا ءتىلىنىڭ بولاشاعىنا الاڭداۋلى جۇرتتى ايىپتايتىن، كۇيە جاعاتىن ۇگىت قۇرالى رەتىندە ۇسىنعان. بۇعان بايلانىستى د. ساتبايەۆ ءوزى دە نارازىلىق بىلدىرگەنىن بىلەمىز.

سول وقيعادان ءبىر كۇن وتپەي ارنا رەسەيلىك رەجيسسەر، پروديۋسسەرلەرمەن بىرگە تۇسىرىلگەن «اراب كوكتەمى. قۋىرشاق باسقارۋشىلار» ("ارابسكايا ۆەسنا. كۋكلوۆودى") دەگەن دەرەكتى فيلم كورسەتتى. باسىنان اياعىنا دەيىن رەسەيلىك يدەولوگيانىڭ ءيسى اڭقىپ تۇرعان، مۇسىلمان الەمىنە اشىق جالا جاباتىن فيلمدە تاعى دا تەلەارنا قازاقستاندىق ساياساتتانۋشىلاردى پايدالانىپ ۇپاي جيناۋعا تالپىنعان. ۆيدەونىڭ ءۇشىنشى مينۋتىندا تاعى دا د. ساتبايەۆتىڭ سۇحباتى سالىنعان. ساياساتتانۋشىنىڭ ترانسۇلتتىق كومپانيالار، مەديحولدينگتەر تۋرالى بۇرىن ايتقان سوزدەرىن اراب ەلدەرىندەگى توڭكەرىسكە قاتىستى پىكىر رەتىندە قوسا سالعان. ءبىر قىزىعى، فيلم جاساۋشىلار سۇحبات بەرۋشىنىڭ ءاتى-جونىن تيترمەن بەرمەگەن. ۇرلىق ۆيدەو بولعان سوڭ ۇياتتارى وياندى ما، باسقا سەبەبى بار ما، ول جاعى بەيمالىم.

سونداي-اق، وسى فيلمدە (4:20 مينۋت) راسۋل جۇمالى دەگەن تيترمەن تاعى ءبىر جىگىتىتڭ پىكىرى بەرىلگەن. ءبىراق، ول سۇحبات بەرۋشى ءبىز تانيتىن ساياساتتانۋشىعا مۇلدەم ۇقسامايدى. فيلمدەگى «راسۋل جۇمالى» لاڭكەستىكتەن كەلەتىن شىعىندار تۋرالى ەسەپ قاعىپ وتىر.

وسىلايشا، الەمنىڭ ءار تۇپكىرىندەگى توڭكەرىستەر مەن نارازىلىق شارالارىن جامانداپ، قازاقتاردى ۇركىتۋ، ۇرەيلەندىرۋدى ماقسات ەتەتىن ارنا سول ارامپيعىلدارىنا قازاق زيالىلارىن دا پايدالانۋدى كوزدەيتىن سياقتى.

تەلەارنانىڭ بۇل قياناتى رەسپۋبليكالىق دەڭگەيدە كوتەرىلىپ، جاڭا قۇرىلعان اقپارات جانە كوممۋنيكاسيا ءمينيسترىنىڭ دە قۇلاعىنا جەتكەن بولاتىن. الماتى قالاسىندا وسى ارنانىڭ تەلەحابارىنا قاتىستى شاعىمعا ساي، سوت پروسەسى دە ءجۇرىپ جاتقانىن ەستەرىڭىزگە سالامىز.