«الەۋمەتتىك جەلىدە مەنىڭ باۋىرلاس حالىققا قاراتا ايتقان سوزدەرىم كەزدەيسوق ايتىلدى. ول ەموسيانىڭ سىرتقا توگىلۋى ەدى». بۇل ورالدىق بارد ءانشى، ۇلتارالىق ارازدىق تۋعىزدى دەپ ايىپتالىپ جاتقان جانات ەسەنتايەۆتىڭ جازعان حاتىنان ءۇزىندى. ورالدىق ساياساتكەر تەرگەۋ ورگاندارى مەن قوعام مۇشەلەرىنە ءوزىنىڭ ىسىنە شىن وكىنەتىنىن ايتىپ، حات جولداپ وتىر. بۇل تۋرالى Qamshy.kz حابارلايدى.
حاتتا جانات ەسەنتايەۆ ءوز شىعارماشىلىعىنا ءار قاشان وتانعا دەگەن سۇيىسپەنشىلىكتى، ەركىندەك پەن حالىققا دەگەن ماحابباتتى ارقاۋ ەتكەنىن، ەشقانداي جاپپاي تارتىپسىزدىكتەر مەن زاڭ بۇزۋشىلىقتار تۋرالى ويلاماعانىن ايتادى.
«مەن ەشقاشان قازاقستانىمىزدا سوعىس پەن كۇيرەۋ بولعانىن تىلەمەدىم. قازاقتار ەڭ بەيبىتشىلىك سۇيگىش حالىق بولعان، بولىپ وتىر، بولا دا بەرمەك. ءبىز بارلىعىمىز بەيبىتشىلىك پەن كەلىسىمدە ءومىر ءسۇرۋىمىز كەرەك»، - دەگەن ول قازاقستاندا قانداي دا ءبىر كۇردەلى جاعداي بولا قالسا ءوزىنىڭ ەشقانداي ارانداتۋشىلارعا ەرمەيتىنىن ايتادى. سونداي-اق ول، ءوز سوزدەرى بىرەۋلەردىڭ ۇلتتىق سەزىمىنە نۇقسان كەلتىرسە، كەشىرىم سۇرايتىنىن ايتادى.
«وسى حاتپەن مەن قوعامعا، تەرگەۋ ورگاندارىنا ءوزىمنىڭ ورىستاردى قورلاۋ تۋرالى ارام ويىم بولماعانىن جەتكىزگىم كەلەدى. ەگەر مەنىڭ سوزدەرىم بىرەۋلەردىڭ نامىسىنا تيسە، شىن كوڭىلىممەن كەشىرىم سۇرايمىن»، - دەيدى ءانشى.
«تريۋبا» گازەتى ساياساتكەر-انشىنىڭ جاقىندا بوستاندىققا شىعاتىنىن، ماسەلەنىڭ بۇلاي شەشىلۋىنە قوعام بەلسەندىلەرى مۇحتار تايجان مەن گۇلجان ەرعالييەۆانىڭ سەبەپ بولعانىن جازادى.
