5 ماۋسىمدا اقتوبەدە بولعان قاندى قىرعىنعا قاتىسى بار دەگەن كۇدىكتىلەردىڭ بۇگىنگى كۇنى 18ء-ى ءولتىرىلدى، - دەپ حابارلايدى Qamshy.kz.

ول ون سەگىز ادامنىڭ 17ء-ى تەرروريست، بىرەۋىنىڭ ولارعا كومەك كورسەتپەك بولعان سىبايلاسى ەكەنىن ايتادى قۇقىققورعاۋ ورگاندارى. ەندى سول وقيعالاردىڭ حرونولوگياسىنا توقتالايىق.

5 ماۋسىم كۇنى «پانتەرا» دۇكەنىندە ءۇش تەروريست ءولتىرىلدى. 6655 اسكەري بولىمىنە شابۋىل كەزىندە تاعى بىرەۋى جويىلدى. كەيىن قارۋلى قۇرىلىمدار تاعى ەكەۋىن ولتىرگەنى حابارلاندى. ءسويتىپ، 5 ماۋسىمدا بارلىعى التى ادام ءولتىرىلىپ، جەتەۋى قولعا ءتۇستى، ونىڭ ەكەۋى جاراقاتتانعان.

6 ماۋسىم. ءىىم رەسمي وكىلى الماس سادۋبايەۆ تۇنگى بولعان جەدەل ىزدەستىرۋ شارالارى بارىسىندا قارسىلىق تانىتقان تاعى بەس تەرروريست تۋرالى مالىمدەدى. ءسويتىپ، قاندى وقيعانىڭ ەكىنشى كۇنى قازا بولعان كۇدىكتىلەر سانى 11-گە ءوستى، 9 توعىز ادام ۇستالدى.

7 ماۋسىم. ءىىم تەروريستەر تۋرالى جاڭارتىلعان مالىمەتتەر ۇسىندى. ا. سادۋبايەۆ سول كۇنگە دەيىن بارلىعى 13 قىلمىسكەردىڭ ولتىرىلگەنىن ايتتى.

9 ماۋسىم. ءىىم ارنايى قىزمەتتەرمەن بىرلەسىپ بوي تاسالاپ جۇرگەن التى قىلمىسكەردى ىزدەۋ ءجۇرىپ جاتقانىن حابارلادى.

10 ماۋسىم. اقتوبەدە كۇشتىك قۇرىلىمدار تاعى ءبىر ارنايى وپەراسيا وتكىزدى. كوپ قاباتتى ۇيلەردىڭ بىرىندەگى پاتەرگە جاسىرىنعان 4 لاڭكەستىك ولتىرىلگەنى حابارلاندى. بۇل تورتەۋدەن باسقا، وسى كۇنى قالانىڭ باسقا بولىگىندە تاعى ءبىر قىلمىسكەر ولتىرىلگەن.

وسىلايشا، قازىرگى تاڭدا كۇدىكتىلەر ىشىندە ولتىرىلگەندەر سانى 18 ادامدى قۇراپ وتىر. ۇستالعاندار 9 بولسا، تاعى ەكەۋى بوستاندىقتا كورىنەدى.

5 ماۋسىم كۇنى بولعان تەراكتىدە قارۋلى قىلمىسكەرلەر قولىنان 7 ادام (ونىڭ ۇشەۋى - اسكەريلەر) قازا تاۋىپ، 38 ادام جاراقات الدى.

ۇقك بۇيرىعىمەن ەل بويىنشا لاڭكەستىك قاۋىپتىلىكتىڭ «سارى دەڭگەيى» ەنگىزىلدى.