بۇگىن پارلامەنت ءماجىلىسىنىڭ جالپى وتىرىسىندا باقتىقوجا ىزمۇحامبەتوۆتىڭ وتستاۆكاسىنان كەيىن، دەپۋتاتتار جاسىرىن داۋىس بەرۋ ارقىلى پالاتانىڭ جاڭا ءتوراعاسى لاۋازىمىنا نۇرلان زايروللا ۇلى ءنىعماتۋلليندى سايلادى، - دەپ حابارلايدى Qamshy.kz قازاقپاراتقا سىلتەمە جاساپ. 

ق ر كونستيتۋسياسىنىڭ 58-بابى، 1 تارماعىنا سايكەس، ق ر پارلامەنتى ءماجىلىسىنىڭ ءتوراعاسى مەملەكەتتىك ءتىلدى ەركىن مەڭگەرگەن، ءماجىلىس دەپۋتاتتارىنىڭ اراسىنان پالاتا دەپۋتاتتارى جالپى سانىنىڭ كوپشىلىك داۋىسىمەن جاسىرىن داۋىس بەرۋ ارقىلى سايلانادى. ال ءماجىلىس ءتوراعاسىنىڭ قىزمەتىنە كانديداتۋرانى پالاتا دەپۋتاتتارى ۇسىنادى. وسىعان بايلانىستى دەپۋتات قۋانىش سۇلتانوۆ ءماجىلىس سپيكەرى لاۋازىمىنا ن. نىعماتۋليننىڭ كانديداتۋراسىن ۇسىنعان بولاتىن. ماجىلىستەگى پارتيا فراكسيالارى باسشىلارىنىڭ بارلىعى دا كانديداتۋرانى قولدادى. ءتوراعانى سايلاۋ بويىنشا قۇرىلعان ساناق كوميسسياسىنىڭ مالىمەتىنشە، جاسىرىن داۋىس بەرۋگە قاتىسقان پالاتانىڭ 102 دەپۋتاتىنىڭ بارلىعى ءبىراۋىزدان ن. نىعماتۋليننىڭ كانديداتۋراسىن جاقتاپ داۋىس بەرگەن.

ەسكە سالا كەتەيىك، ەلباسى نۇرسۇلتان نازاربايەۆ ق ر پارلامەنتى ءماجىلىسىنىڭ «نۇر وتان» پارتياسى فراكسياسىنىڭ كەشەگى جيىنىندا پارلامەنتتىڭ الداعى ۋاقىتتا اتقارۋشى بيلىكپەن اراداعى ءوزارا ءىس-قيمىلدى بەلسەندىرەك جۇرگىزۋى قاجەتتىگىنە نازار اۋدارعان بولاتىن. «ءبىز ۇكىمەتكە جۇمىستى بايىپپەن جۇرگىزۋگە مۇمكىندىك بەردىك، بەلگىلى ءبىر جەتىستىكتەرگە قول جەتكىزىلدى. ءبىراق بۇل جەتەكشى ساياسي پارتيامىز «نۇر وتان» مەن ونىڭ فراكسياسى ۇكىمەتتىڭ الدىنا قويىلاتىن مىندەتتەردىڭ ورىندالۋىنا قاتاڭ قاراماۋى ءتيىس دەگەندى بىلدىرمەيدى. ورىندالۋى قاجەت ستراتەگيالىق باعدارلامالار بار. ءبىزدىڭ ءوز ەلىمىزدە دە، شەت ەلدەردە دە ورىندالۋىن جۇرت باقىلاپ وتىرعان نەگىزگى مىندەتىمىز - بەس ينستيتۋسيونالدىق رەفورمانىڭ ىسكە اسىرىلۋى جونىندەگى «100 ناقتى قادام» ۇلت جوسپارىن جۇزەگە اسىرۋ»، - دەگەن بولاتىن مەملەكەت باسشىسى.