شىعىس قازاقستاندا «دونور، وزگەگە ءومىر سىيلا!» اكسياسى باستالدى. تاڭسارىدەن وبلىستىق قان ورتالىعىنا اعىلعان جۇرت ءوز ەركىمەن قان تاپسىرىپ، اكسياعا بەلسەندى تۇردە قاتىسۋدا، - دەپ حابارلايدى Qamshy.kz.
ايماقتا ءبىر اي بويى وتەتىن ناۋقانعا قاتىسامىن دەۋشىلەردىڭ دە سانى شەكسىز. شارا بارىسىندا اسكەريلەر جانە ءبىرقاتار مەملەكەتتىك ورگان قىزمەتكەرلەرى ۇجىممەن قان تاپسىرادى دەپ كۇتىلۋدە.
«وسىنداي اكسيالاردىڭ ارقاسىندا دونور اتانىپ، قان تاپسىرۋشىلاردىڭ سانى ارتا تۇسەدى. وسكەمەن قالاسى، جاقىن ماڭداعى اۋىلداردان، ءتىپتى اۋدانداردان دا كەلىپ جاتادى. جالپى حالىقتىڭ بەلسەندىلىگىنىڭ ارقاسىندا دونورلاردىڭ سانى جىلدان-جىلعا ءوسىپ كەلەدى»، – دەدى وبلىستىق قان ورتالىعىنىڭ ديرەكتورى حايرۋللا جيگيتايەۆ.
شقو بويىنشا ءوز ەركىمەن قان تاپسىرۋشى دونورلاردىڭ سالماق ۇلەسى 91 %-دى قۇراعان. دەرەكتەرگە سۇيەنسەك، 34 ليترگە دەيىن قان تاپسىرعان ازاماتتار دا كەزدەسكەن.
«مەنىڭ دونور اتانعانىما ۇزاق بولماسا دا، ۋاقىتىلى كەلىپ، قان تاپسىرىپ تۇرامىن. سەبەبى ول تەك يگى ءىس ەمەس، ول دەنەدە زات الماسۋدى جاقسارتاتىن ءۇردىس»، – دەدى قالا تۇرعىنى ەۆگەنيي كۋرلىحين
