ورالمانداردىڭ كۆوتا الۋى وڭايلايتىن بولدى، - دەپ حابارلايدى Qamshy.kz 31-ارناعا سىلتەمە جاساپ.

ىقتيارحات پەن ازاماتتىق اراسىندا سەندەلگەن قانداستارعا قۋانىشتى جاڭالىق بار. توقتاپ قالعان كۆوتا ورالماندارعا قايتا بەرىلەتىن بولدى. سونداي-اق، ەندى ازاماتتىق تا ءبىر جىلدان كەشىكتىرىلمەي بەرىلۋى مىندەت. وسىلايشا، كۇتپەگەن جەردەن باتىل قادامعا بارعان شەنەۋنىكتەر، ءتىپتى جۇمىس پەن باسپانا ماسەلەسىن دە شەشىپ بەرەمىز دەپ ۋادەنى ءۇيىپ توگىپ جاتىر. ءبىراق، ول ءۇشىن شەتەلدەن كەلگەن قازاقتار ۇكىمەت بەلگىلەپ  بەرگەن وبلىستارعا عانا بارۋلارى ءتيىس ەكەن. 

اتامەكەنگە كەلىپ قازاقستان ازاماتتىعىن الا الماي جۇرگەن مادينا دارحانبايەۆا  بۇل جاڭالىقتى قۋانا قابىلدادى. ويتكەنى، ءتولقۇجاتقا قول جەتكىزە الماعان سوڭ، اۋىر دەرتكە ۇشىراعان ءبۇلدىرشىنىن  دە تەگىن ەمدەتە الماي جۇرگەنىنە بىرنەشە جىل بولعان.  ايتۋىنشا، دارىگەرلەرگە بارعانىندا،  ازاماتتىعى جوقتارعا  وتا تەك اقىلى تۇردە جاسالادى دەگەن.  ال، بالاسىنا  جانى اۋىرعان وتباسى ايانانى اياعىنان تۇرعىزۋعا شاماسى جەتپەي وتىر.

مادينا دارحانبايەۆا:

- ەل قاتارلى ادام سياقتى اياعىنان ءجۇرىپ كەتسىن قىزىم. ايتارىم سول. كومەكتەرىڭدى بەرىڭدەر ادامدار.

ەندى  مادينا دارحانبايەۆا سياقتى اعايىنعا ازاماتتىق 1 جىلدىڭ ىشىندە ەش كەدەرگىسىز بەرىلۋى مىندەت. بۇعان دەيىن شەتەلدەن كەلگەن قانداستارعا ىقتيار حات پەن بانكتەگى ەسەپشوتتا قارجىسى بولۋى تالاپ ەتىلگەن. بۇل شەكتەۋ دە الىنىپ تاستالدى. ءبىراق، زاڭعا تاعى ءبىر جاڭا وزگەرىس ەنگىزىلدى. ياعني  جۇمىس پەن باسپانا جانە مەملەكەتتىك كۆوتاعا ىلىگۋ  ءۇشىن ۇكىمەت بەلگىلەگەن تەك جەتى وبلىسقا بارۋلارى ءتيىس.  ناقتىراق ايتقاندا اقمولا وبلىسىندا 120 ادامعا، اتىراۋ وبلىسىندا 28 ادامعا، شىعىس قازاقستان وبلىسىندا 260، قوستاناي وبلىسىندا 21 ادامعا تەگىن كۆوتا قاراستىرىلعان. ال، سانى جاعىنان كۆوتانىڭ ەڭ كوبى ەلىمىزدىڭ سولتۇستىگىنە بەرىلمەك.

كۇلسىم ىسقاقوۆا، الماتى قالاسى مەملەكەتتىك ەڭبەك ينسپەكسياسى جانە كوشى-قون باسقارماسىنىڭ ءبولىم باسشىسى:

- پاۆلودار وبلىسىنا 690، سولتۇستىك قازاقستان وبلىسىندا 108 ادام وڭىرلىك كۆوتانى پايدالانۋعا مۇمكىندىكتەرى بار. ول ءۇشىن وسى ايتىلعان وبلىستارعا بارىپ وتىنىشتەرىن قالدىرۋلارى كەرەك.

الايدا، وتىنىشتەر قابىلدانىپ جاتىر دەپ ەلدى ەلەڭ ەتكىزگەن  ەڭبەك يسپەكسياسىنىڭ باستاماسىنا كۇدىكپەن قاراپ وتىرعاندار كوپ. قۇجاتتار ءسوز جۇزىندە قابىلدانىپ جاتقانىمەن، كوشى-قوننىڭ  الدىنداعى قىپ-قىزىل داۋ ءالى باسىلعان جوق دەيدى قانداستاردىڭ وزدەرى.

گۇلناز باقتيار قىزى:

- اۋەزوۆ اۋدانىنا بارىپ كەشە سۇراعانىمدا ءالى بەرىلىپ جاتقان جوق دەدى. ءسوز جۇزىندە عانا بارلىعى. قۇجاتتى قابىلداپ جاتقان جوق ەشكىم.

زاڭداعى وزگەرتۋلەرگە سەنسەك، اتامەكەنىنە ورالىپ، جىلداپ ازاماتتىق الا الماي جۇرگەندەردىڭ ەندى جولى بولۋى ءتيىس. دارحانبايەۆتار وتباسى دا باستالعان ءىستىڭ قاعازباستىلىققا سالىنباي، جىلدام جۇزەگە اسارىنا  ءۇمىتتى.  ويتكەنى كىشكەنتاي ايانانىڭ ەمى ۋاقىت كۇتتىرمەيتىن ماسەلە.

مادينا دارحانبايەۆا، ورالمان:

- ءتورت جاسقا دەيىن جاساتۋ كەرەك. ايتپەسە كەشىگىپ قالامىز. قىزىم ءومىر باقي وسىلاي بوپ قالادى.