بۇگىن پارلامەنت پالاتالارىنىڭ بىرلەسكەن وتىرىسىندا ءماجىلىس دەپۋتاتى ومارحان وكسىكبايەۆ سالافيزمگە تىيىم سالۋ ماسەلەسىنە قاتىستى ءوز ويىن ءبىلدىردى، - دەپ حابارلايدى Qamshy.kz Baq.kz-كە سىلتەمە جاساپ.

«ەندى، ونى ءقازىر ولاي-بىلاي بولادى دەپ ايتا المايمىن. جالپى، ءسالافيزمنىڭ ءوزىنىڭ يدەولوگياسى ءبىر كەرەمەتتەي تەرىس دەپ ايتقىم دا كەلمەيدى. سەبەبى ساۋد ارابياسى مەملەكەتى وسى باعىتتى قولداپ، دىندەرىندە قولدانىپ ءجۇر. ونىڭ وزىندە راديكاليزمنىڭ ەشتەڭەسى كورىنىپ تۇرعان جوق. بىزدە سونى بۇرمالاپ الىپ كەتەتىن، سونىڭ اتىن جامىلىپ، ءبىراق باسقا باعىتتا ادامنىڭ ومىرىنە ءقاۋىپ كەلتىرەتىن، مەملەكەت قۇرىلىمىنا ءقاۋىپ توندىرەتىن ماسەلەلەر ول باسقا دۇنيە. سوندىقتان ول مىناۋ قويدىڭ تەرىسىن جامىلىپ العانىمەن قاسقىر قوي بولمايدى. ءيا، سوندىقتان ىشكى قۇرىلىسىن ءبىلۋىمىز كەرەك. سول سەبەپتى زاڭدا، جالپى قابىلداناتىن شەشىمدەر دە سول ىشكى قۇرىلىسىن تانىپ بارىپ، جاسالۋى قاجەت دەپ ويلايمىن»، - دەيدى دەپۋتات و. وكسىكبايەۆ.

ايتا كەتەيىك، كۇزدە دەپۋتاتتار ءدىني بىرلەستىكتەردىڭ قىزمەتىن رەتتەۋگە ارنالعان زاڭ جوباسىن قاراۋدى جوسپارلاپ وتىر. دەپۋتات ماۋلەن اشىمبايەۆتىڭ ويىنشا، سالافيزمگە قارسى ءبىز ءوز يدەولوگيامىزدى قويۋىمىز قاجەت. ال دوساي كەنجەتايدىڭ سوزىنە قاراعاندا، سالافيزمگە تىيىم سالىنسا، ەلىمىزدە قانتوگىستەر بولۋى ابدەن مۇمكىن. دەگەنمەن، قازاقستاننىڭ كۇش قۇرىلىمدارى وسى باستاماعا دايىن بولسا، اتالعان اعىمعا ەشبىر قيىندىقسىشش تىيىم سالۋعا بولادى.

ال، بۇگىن ۇقك باسشىسى 26 ماۋسىم كۇنى قاراعاندى وبلىسىندا لاڭكەستىك ارەكەت جاساۋدى جوسپارلادى دەگەن كۇدىكپەن تۇتقىندالعان 6 كۇدىكتى مەن ۇستاۋ كەزىندە ءوزىن جارىپ جىبەرگەن ءبىر كۇدىكتىنىڭ ءسالافيزم اعىمىن ۇستاناتىن توپ وكىلدەرى ەكەنىن حابارلادى.